عبو القلوب
عبو القلوب سلام
خليكم الحب للقريب
نبض البعيد مليان غرام
يا طيبة الأرض البسيطة
ونفحة الأهل الكرام
الشوق سرف نفَس الحبيب
واتمدَ إلفة وإنسجام
الدنيا أجمل لو نعيش
الليلة زي باكر تمام
والناس مع الناس تكتمل
اصحاب أساسم إحترام
دفتر حضور افراح ونور
إسمك نده باصم سرور
رف الحمام بين طين وسور
رسل خطاب همسة وعتاب
حاربو الغياب بي حب جهور
يتسابق الهوى في الكفوف
واحد مبادر بالحنين
والتاني رغم الحال حضور
واحدة بتجيب كيمان فرح
والتانية بتزين سطور
عنوانا في أجمل كتاب
إنسان غيور ووطن وقور
يااااا كل من رسم السعادة
ولوَّن الطيف بالمقل
النية موطن للعبادة
وبذرة لي أصدق عمل
تتعب تصِر تمشي وتقيف
وتكتف الهم بالأمل
في كل خطوة إنتصار
حتلاقي مشوارك مَثل
أهو دا البِطايبك شوقو ليك
من كل بيت ينده عليك
في كل فجة يهاتي بيك
رغم المسافات والبعاد
شايف التسامح في عينيك
وانا وانتَ والجاي والبفوت
لو صوتنا بحَّ مع الزمن
حنَّادي بي أصدق سكوت
أو عترت فيضنا الظروف
مانخلي عزم النيل يموت
يلاكا نبني بيوت شِعِر
أو بيت شَعَر أو بيت خيال
ما بهِم إذا اختلف الإسم
جوانا للطيبين بيوت