براق الصعيد
براق الصعيد جدد عليا حساري
فك ساهيتو والزيف البولع ناري
الضحوي العوير عقبنو ليه سواري
جابن حتي دوداب المشارع جاري
الوادي المجرف وعرقو بلحيل ضاري
جاب هشوم مكنت ماشي كنو لواري
بي العربيه محتاج لي تمانيه كباري
قطعوه الضعنهم في الرحيل متباري
واتشبح فريق عربا اصال ومضاري
فوق قوزا عضي وساوي ومقامو بضاري
ماهم ناس جررب ناس قفوف وضهاري
حد عينك تشوف بتشوف خضار في خضاري
نازلين فوق بخيت دنيتو البقاري
ترا الحم جاورنو وحمره جاتو عصاري
وام سورج موقفه بوشها كده نهاري
شبعت في الرقيص عيل مالقت طمباري
والبسطه الكبيره السيد الكبساري
بعزم بي طلاق عيل تشرب الدباري
خلاص جوعة الرشاش عدت صرفها الباري
وضحي بطقطقها مطالتو ام حروف مابضاري
وناس زينوبه وردن في الرهود وا ناري
وجابن ذكرة المتقشطين بي كماري
ولدا متلي طافش وفي المدارس قاري
مابتسمعلو في طاعم غناهن طاري
واللباعه مرقت من سهم ناس ساري
تتراحل مع الهرع البسوق متباري
والماشي العرب شد البهيج الباري
قصر لي المشط شال الكلاش الفاري
البزر القعادهم في الفريق لي طاري
جاب ليهم بشارة السافل المخباري
ديل يااخويا ما جايبهم الجراري
جايين عافي بس مستغرضين في مضاري
بعدباكر بغير كل زول في بشاري
وبخلو الدكي لي عاشق الشفون والساري
دكتور جمعه جاتك راجعه كان بتباري
بسم الله قول دي الفاتحه في مسداري
