النمة لو بتجيبك
كباشي محمد الماحي
النمة لو بتجيبك
غيري مين حبيبك
ارض اليباس
وراجي يوم صبيبك
يا حارقة جوفي وح
قلب الثبات ان زح
مكتول هواك
لا حمة يوت لا قحه
متغرب بى المداين
زى طيرة الجناين
انقد في خيالي
يا بهرة الرتاين
تتضاري ما بتبيني
ولا هماك أنيني
اساهر الليل
واسوقو بى حنيني
طمباري ما رضيتيني
ضعيت فيك سنيني
اطول سماك
والجايه تاني تجيني
يا قصيبة في جروفا
محال الناس تشوفا
عاد لا متين
تكوسو لى حروفا
طلة جبينا الضاوى
زغلل عيون الراوي
فرهيدة الجناين
لزيارة فريقا ناوي
(كباشي) لو تلاقي
قصيبة السواقي
تتعجب في دلالا
وتنتح صفايح الساقي
تمخول العواقل
من شندى لا المناقل
بت امات عسين
حلالة المشاكل
فرهيده تابرة تلالي
زى بوقة البلالي
مهمومه بى جمالا
مي راتية تب لى حالي
