ادياتك

اِديَّاتَكْ بِريقاتاً دَفَرْ قِبْليهِنْ
دَفَاريك كيف زويقات الفِراد وَشَليهن
مِعْزِي القَرْقَفْ الهَسَّع بِعامي جَديهِن
اِنْ اتْنايَنْ الليله الرِّغامْ تَدْنيهِن

زورَكْ طالْ وجوفَكْ رَقْ
وبولَكْ عَفَّسْ النّوتِيَّه من فوق جَقْ
جَرْقومَكْ بِهَنْدِسْ في النَّدلْ ما بَقْ
ناسي الغَزّا نَهَّادو وصِغيِّرْ دَقْ

سرجك فَلَّعْ الحُوفَه وبطونَكْ رَقِّنْ
دَفاريك شَيَّلِنْ بَلِّنْ وريدَكْ وسَقِّن
بِتْمارا البِشارِف لينا قَلْبو ميَقِّن
بينَّا وبينو حَدَباً فوق سِنافو مدَقِّن

بَدَل ايديك علي قَصَب الدُّرو البِتْمَوَّحْ
تِعْلاً قابَلْ الحَدَبِي وصبيبو شَلَوَّح
يا هَجَّام فريق زولاً حديثو مَلَوَّح
الفور دابْغو والخَبْ سَوَّلو النّوق رَوَّح

جاوَزْ خَبَّةْ السّمْع القَنَصْ لي صيدو
عارِفْ سيدو عَقَّبْ لي رَمَادو وريدو
هَجَمْ المَلَّكْ الدّور في قبيلتو وحيدو
وَاصْبَحْ جَبْدي كيف سارْبْ الهَيَتْ بي قيدو

ما قُتْ ليَّا جَرَّايْ وَاصْلَكْ آبْتَتْحاحَه
وغير كَمَّالْ حدود الرّيدي مافي ارْتاحَه
خَرَطْ الدّير وحَدَرْ القَفْ علي المَيَّاحَه
تِعْلاً سَرَّبْ العِصْراتْ وصادْلو بَيَاحَه

خَفْسو وكَبّو بي الحَدَبْ البعيد ومَغَيَّسْ
قَطَراً سَكَّ نِمْرَه ولي المَخَطَّاتْ مَيَّس
تَلَتْ اللّيل مع القَفَلْ الكَلاماتْ وَاْيَّس
وَاْصْبَحْ غادي في دارْ ذاتْها ما بْتَتْقَيَّس

سَرْجَكْ نَجْرو مو تهْليف شديدو مَتَفَّقْ
قالْجْ الحِرْتِي والقيح فوق خبيرتَك دَفَّق
ليَّا وليك شَبَه بَرْيي وقِعَادْ ما وَفَّق
قوم يا تِرْكَةْ الصَّهَّابَه اْرَحْ نَتْرَفَّق

بِقيتا ضعيف بَعَدْ ما اتْرَدَّم الكونيب
وسرجَك عَمَّتو الفَرْوَه المَلاني سَبيب
طالْبْ الشَّال عَوَالِي ومُقْنَعو اللَّاهْليب
تَرَا المِسا جاكا رومِسْ سَوْ قنيصْ الضّيب

بَعَد ما كَمَّل القَشْ المِغَيِّسْ عِرْقو
عُقْبانْ مِنّو قِرَّاوي السُّواقَه بَدِرْقو
ليلَكْ هَوَّي يا السَّلَقْ السّموعَكْ بِرْقو
سيدَكْ عِنْدو فوريكْةْ النَّميم ما بسِرْقو

هَسَكْ الغُرْدَه قِدَّام مِنْ حِقابَكْ لَدَّمْ
الكور بي رَدِفْ طافْتينْ حَدَرْ واتْقَدَّم
الليل جانا دونْ عَرَبْ القَفَاهُ مَرَدَّم
آ الشوحْ تاني دورْ اُمَّاتْ مَدَاديغْ هَدَّم

دومتَكْ جايبي دفَّاقة الرِّعاف الزَّرْقَه
كوعَكْ فاز ورَقَلَكْ بي المَفازاتْ سَرْقَه
كَفَّكْ احَرْتو يا لِضْ اُمْ حَقيبْتاً بَرْقَه
والليل جاكا يا ضيب الدماساتْ ارْقَي

تَرَاكا بقيتا حَنّوفَه وقَناها رقاق
ودومْتَكْ جايْبَه حِرْتَاً دَفَّقو المُحْراق
رَقَلَكْ بي المَفازات بِقْرِبْ العُشَّاق
تِعْلاً قابَلْ الحَدَبي ام صَنَقَّرْ وساق

بَشوفَكْ مِنْعَبِرْ تَدّي الضَّرَايِبْ كَتِّي
غارْبَكْ قَلْوَزْ الشَّدِّي وقَفَاكْ مِتْعَتِّي
ياحليل طَمْبَةْ الرّيلْ اُمْ مَشِتَاً تَتِّي
دَغَسَه وكَحْلِي والدّيسْ فوق ضميرها مسَتِّي

البولْ قالْجو دَاكْ فوق دي ورَقَدْ مِتْصَنِّعْ
وتارْكَكْ لي حَمَالاتَاً قبيل مِتْمَنِّع
هَسَّاع زولنا بي عالي الهدوم مِتْقَنِّع
ابْيَضْ غِرْدي والديس فوق ضميرو متَنِّع

حَنَّنْ ضِرْوَتو وكَشَحْ المِصاعْ بي سَبايبو
وقَنَّبْ عيل بِحَنِّكْ لي الجَمَلْ في ضَرَايْبو
البَهَمْ العَجَّنْ المَحْلَبْ سَقَابو وَضايبو
ما بِنْرازْ بلا الطَّعَنِنْ دِقَاقَه نوايبو

رَدّيتْ ليهُ رَسَنْ الدّيرْ عِرِفْتَ قياسو
كورتو معَوْلي دَغْياناً مِغَلِّقْ ساسو
هَقَشْ وَانْشَطْ علي الفي الكاسْرِي وَقَّ فراشو
فَتَحْ الكوز وعَجَنْ الخُمْرَه لي نَفَّاشو

كُورَكْ جَضَّ مِزِّيقي وجَوَالْسَكْ صَرِّنْ
ايدينَكْ كَشَّنْ الدَّانْقيل وجِنْحيكْ فَرِّنْ
الهَوَّابْ ابوجِلْدَاً حِلو ومِتْمَرِّن
هانَكْ وشَمَّشَكْ لامَنْ جَرَاقْمَكْ خَرِّن