أيوة بخونك

أنا كذبت عليك يا غاليه

أنا يوماتي حبيبتي بخونك

لما تغيبي بغازل طيفك

ولما تجيني بدوب في عيونك

أيوه بخونك مع بسماتك

مع رصات الدر في عيونك

أيوه بخونك بيك وبلاكي

وآسف جدا إني بخونك

أيوه بخونك بيني وبينك

ولما تكوني بعيده وسارحه

أيوه بخونك مع خصلاتك

وشعرك موجة ليلي الطامحه

أيوه بخونك وإنتي قوامك

هد قوام المهره الجامحه

ايوه بخونك وعارف إنك

طيبة وإنك ديمه مسامحه

أنا لو خنتك مع زول غيرك

إلا اكون أنا واحد غيري

وإلا يكون القلب إتبدل

وفكري إتغير من تفكيري

وإلا يكون الزمن إتحول

وإلا أكون مووت ضميري

انا لو خنتك مع نظراتك

ما من حقك إنو تغيري