غيماتك
غيماتك الشرن .. تخن
وأنا حارسه ليلي مناي تصب
وتهب
إذا نارك طفت
أو إكتفت ختيتله شب
الصوت دا من آخر الشوارع
الحافرة ظنها ألف جب
وأنا ماشة بالصدق العلي
أسمعني واقعه وراكا روووب
الصحاب العلموك الطعنه
نزفو وراكا .. سب
إتخاتفوك سوء وإنقسام
ضبحوك وعاينو بالكروووب
يا الله ميت ولا حي
يا الله دمو نزيف يصب
يا الله خاوية القدرة
أنكشف الغطا البراني
لسع فيني لب
أسترني من طقيع كلام الحارة
والقول عسكروب
في الظني فيهو قدر يخيب مابخيب
ويملا قليبي حب
شمتتني طول السكه
في الخطوة التمش تحفر وراك ..
قلبك يصر .. دمعك يشر
تبلعها مر .. تمشيك براك ..
إيدك تفك إيد المعاك ..
الماشة في السكة التمش
والتنكمش
مابنخمش
من روحي
بل بي روحي
بشفي جروحي
مرواد عيني مابطعني شوف
وأنا من صغيرة بخافلي خوف
من ضلي
من حالي العلي
يا صاحبي كر
ماتجر
عليك الماضي
فتفات الكلام الفاضي
وأبلع صدقي مر
يا بلدي شن لازم السكات
واليوم بدون مانحس بمر
وأنا صابرة ماجزع الصبر
وأنا ميته ما إنفتح القبر
بيناتنا الله
هو عارف إني سكته
من غبنك جبر
أنا قلت ليه البينا
شوف عينا
العلي
وقعدت ليه في الواطه
ابكي عليا حي
وشحدتو ضي
وعديت ولاد الرمله
ما أبهى الولاد
البعزو الخطوة
في درب البلاد
البسترو الجوع
إذا ما الفقر جاد
البردو الظلم
إذا ما الظلم ساد
ديل ولاد عازة
التلهلب بالغنا
التلبه إذا سكت الصبر
دارت شهيد
يا بلدي إيد
أحسبها اولاد الحلال
أحبسبها الدم في الوريد
أنزف قدر أنزف وجع
يفتح علي بالغفلة طابور دم جديد