الصباحات مستبدة
الصباحات مستبده ..
والجراحات شايله سكين
للجراحات النزايفه مستعده ..
ويوم بدون عينيك حبيبي
غلبني كلو ولانعدا ..
عقربت جواي مسافتك
قرصت الموت والتحدي
المشاوير ضغط عالي
والرياح متجهة ضدي
الحقايق ما حقايق
وقلبي ليك ملهوف يودي
تكتل الشوق بالدقايق
آريتو لما يموت هو يجدي
وصبري حتربو قرب يكمل
عارف يعمل
من ولاحاجة إخضرار
وجوفي ما ظنيتو يبرد
دام ملان لي حلقو نار
وكلي مجبوره ولابنفع
يلتقني إنكسار
كلو منك ياسواد ليلي
وشكيتك للنهار
أسفة لو ماقادرة ارفع راسي
وأقول ليك .. عديله
أسفة والله دون عيونك
عيشتي فوق للمستحيله
أسفة علشان حيلتي غير حيلتك
ولابتلقاله حيله
والحلول الفرقه فرقه
لابتشيلني ولابشيله
جبري جبرك
وصبري صبرك
كان صبرت علي بعوضك اللراح
وأشرق الليل بالصباح
وألتق الهوى بالجراح
أخلي قلبك ريده ريده
ريده مابتشبه نصاح
يا ملاك ياموت .. تجيني ؟
روحي راحت كلو كلو
وكل مراير الريد بينزل
وينبلع لي حلو حلو
وقالو أي عاشق بيشتاق
إلا للعاشق البزلو
ياصحاب أمري الغلبني
دايرة شورتكم نحلو