نورة

آه يا غُبُشْ

ما عندي ليكم

غير نغيم

برجوه ينفُض لي غبار

زمن القسا الكتّاح

يهِزْ عرجون نخل

صبر الغلابة الطالْ ..

يحِتْ يخرِتْ .تباريح الأسى

الممدودة فوق نور الدُّغُشْ

يا نورا آه ..

يحرَد كنائسنا المسيح

يعرش مدارسنا الصّدى

ييبس يباس

حلق العصافير الوديعة

من البُكَا

يندَرْدَرْ الصّوت البعيدْ

أسيان يصُد من دون صدى

ينكَفْرَنْ الفجر الصّبوح

يحمي الزهيرات الندى

تختا الدراويش الضّريحْ

يسكن خلاوينا الجنون

يهجر جوامعنا الإله

يا نورا آه

تطرح غيوم الشوق تئِنْ

تشرَقْ تموت

خيل كلمة الحق التّناهِدْ

في الشِّفاه

تعقِر بسيمة الصِّحْ

مع لوبي الجّروفْ

تغرِزْ ضريعات الحروفْ

ينشف مُرَاح الأمسيات

تتمطّق الأرضة المروق

والأغنياتْ اللّي الشّروق

والأرض والحب والمطر

تضْهَب تتوه

وكتين يضيع

عرق الجِّباه الشُّم

شمار في مرقة

آه يا نورا آه

من دّرْبِكْ التّور نَفَس

خيل الصّبُر

فَتّر خطاوي الشّوق

وراه يا نورا آه

ساعة الشّموس الغُرْ تهضلمْ

تلحق الصِّح في المغاربْ

تدفر الضو الكهاربْ

في وشيّكْ تزفر المدن

الضّبابية السّرابية الكآبة

وحائط التيِّه والطّشَاشَات

فوق قِفيِّكْ

يا أم عوارض مو دعاشة

ماها شبّورة وتقيفْ

جايي ليك يا نورا غيمة

تملا ماعونك خريفْ

يملأ عينيك ويفضِّلْ

يروي جوّاك

العطاشى مو دعاشة

يا مطر عِزْ الحريقْ

يا مصابيح الطّريقْ

يا المراكبية البتجبِدْ

من فَكْ الموج الغريق

يا الجزاير النتحويبا

لما ينشعوذ بحرنا

جينا ليك والشوق دفرنا

يا نشوغ روحنا ودمرنا

يا المحطات الحنيني

القصّرَت مشوار سفرنا

يا ما شايلك بيني حايمْ

أيوة شايلك بيني حايمْ

في الأرِضْ تكوين قضيّي

في السّمَا الأحمر غمايمْ

بي برِدْ نغما السّلامِي

رَطّبَتْ حلق الحمائمْ

طنبر النّخل التبلدي

راقص الأبنوس وصَفّقْ

سَوّتْ الصقريي موجة

خَلّت النِّيل هاجلو هوجة

بشّرت بالخير بلدنا

شالت الشّبَال نسائمْ

جدّدَتْ زلفي القديم

أمشي بي الماشيبو أقاوم

لا بتكَبِّر راسي فورة

لا بتصغِّرني الهزائمْ

جِنْس يا نورا ابن آدم

حلمو في عالم مسالِم

لا اللّيالي الماها ليّا

لا الشّمَاتات العليّ

لا البنوك المخملية

لا تفاهات الحضارة

لا عفاريت المدينة

لا العمارات السّوامِق

فوق ضَهَر ناساً فقارى

لا الهتاف الفاوا ضارى

غطى بالي من الفوارق

لا الألوهة الطوطميي

لا البرندات الوسيمي

ولا الأسامي الأجنبيي

بتمحى من عيني ملامحِكْ

وإنتي جاية المغربيي

جايي دايخي المغربيي

وشِّك المقبول مكَنْدَكْ

سامسونايتك زمزميي

كونشبر مرزبة .مقطع

ريشة فانوساً مدَرْدَحْ

قلت بيهن لي زمانك

يا زمان الحاجي عندكْ

يا زمان الآفة حدّكْ

لا تطا الوردة الصبيي

يا نفس فجر القصائد

يا بلادي

القَطَع قلب الرّوادي

باللُّواج الجاي وغادي

دا ما هو صوتِكْ لاها صورتِكْ

دي البترقش ناديي

فوق صدر الجرائد

ماها صورتك

لا هو صوتك لاها صورتك

إنتي يا الفطْن الصّحَارَى

شُفّع العرب الفتارى

البَفِنّو الشايلا إيدُنْ

ويجرو كابسين القطارا

يجرو باريين القطارا

لا سراب الصّحرا موية

لا حُجار سلّوم موائدْ

إنتي في الغابة اليصارِعْ

جوفو للآهات تلكِّي

ياما دفّقْ غيم رجاهو

لكن الأيام كركِّي

في خلا حالنا اليمحِّن

ويملأ بالسُّهد الوسائدْ

إنتي غيمة شديرة خيمة

إنتي جاهنا

والتّقَا الطّلَقَت وشينا

فرّقَت غُمّة جباهنا

فرّجت في الحارّة ضيقنا

فرّحَت شُفّع فريقنا

والمواعين الحزينة وإتجاهنا

يا النغيم البقّ فينا

وشدّ لي وتر إنتباهنا

يا تباشير يا بشارة

إنتي يا ضرعاً تَكَرْمَشْ

شان يرضِّعني الجسارة

إنتي في منفاي رفيقة

وفي حشا الأشواق حرارة

يا هُدَى النّاس الحيارى

يا ندى الفجر اليبلِّلْ

صُور عوينات الفقارى

جاي ليك آه جاي ليك

جاى ليك يا نورا آفة

آفة للسوس الجا ينقُرْ

عود عشيماً داخرو فيكْ

وأصلي لمن أدور أجيك بجيك

لا بتعجِّزْني المسافة

لا بقيف بيناتنا عارِضْ

لا الظُّروف تمسك في إيدي

ولا من الأيام مخافة

يا نفس فجر القصائد

ما ضِهِبْ في بُعدي عنِّكْ

اصلي متغرِّب عشانك

راضي بالبيجيني منِّكْ

ما بكيت شُحْ اللّيالي

ولا شكيت نُحْ شلتو حالي

رغم إنو الحال بيفسَخْ

إلا كُت في الحارة بصرخ

يا وطن عِز الشّدائدْ

يا وطــــــــن عِز الشّدائدْ