تلكع تسافر
الجبال قالت غروب
لا المزامير راح تغنى
لا الهجايع راح تذوب
الحزن غطى المسارق
والدروب
مافى غير تلكع تسافر
شيل حقايبك…
وأمشى بينات الشعوب
****
وينك الوحشة التزازيك يا صباح
مسخو الليل بي مزازيك النباح
مافى غير ترضى وتسافر
شيل حقايبك…
وأمشى بينات الشعوب
*
وينك الصحرة
التحجيك بي أم بعلو
الشجر فارد يباسو
وضامى ضلو
والسموم تتحمى تشويك
والعقارب ..
حتى لو غطيت وشيك
ايدك الممدودة ما بتكفيهو كلو
مافى غير تسرع تسافر
شيل حقايبك …
وأمشى بينات الشعوب
****
الظلام حيران وحيد
من غير جناح
غنت القمرية في قلب الخلا
قوقى .. قوقى
وايش تقول ؟؟
يا ليل صباح؟؟
الظلام حيران وحيد
من غير جناح
قتّ نان كيفن نسوى؟؟
جات نسايم هابة
من جهة الجنوب
صرخّت فيك يا مسيكين
شيل سلاحك
أرضى أرضى ..
جوى جوى ..
اللهب من غير جمر
كيفن نسـّوى؟؟
أبقى حالم ولم كلامك
لي زمن من غيرعيوب
ولا سافر..
أمشى في درب السحابة
وجيبة لي أماتنا
زى حطب الفزع
وأرفع الفاس كسرة
ينزل مطر …
مافى غير ترضى وتسافر
شيل حقايبك…
وأمشى بينات الشعوب