أنا الممكون

أنا الـممكون وفاكِّي الريق

جغيمة موية من إبريق

لهيب الجوع حرقني حريق

مِطَفِّق لَي جضيماتي

أقوم فجرية بدري دِغيش

أداقِش شان لِقيمْةَ العيش

أهابِش، والرِزِق هِبّيش

أكان أستر عِضيماتي

وبايت القَوَّة ما اتعشيت..

ولا هَشّيت، ولا بشّيت

وكم من بيتنا كم طشّيت..

أجرجر في كِريعاتي

أزوزي وروحي قلقانة

وسعادةَ الصلعة عرقانة

ولساني كأنُّو دُلقانة

تَزِنّ وتَصِن إضيناتي

طيور الشوم مصابحاني

وهموم العيشة ضابحاني

وسَموم الفلسة لافحاني

تمَعِّط في شنيباتي

وحوش الدَين مِطارداني

وديمة مدامي زارداني

وبي المفراكة كارداني

وحالفة تبيع جزيماتي

مكندك كندكة كدروك

ملكك لَكَّة المفروك

متَوَّك تب شقي ومعروك

تشوفني تقول: دا بعَّاتي

أنا الطاقَّاني خرمة شاي

وأنا الماكلة الكديسة عشاي

وأنا الهردن ديوني حشاي

ألَتِّق في هديماتي

أنا السارح صباح ومساي

أصارع في زمن قسَّاي

أعاين فيك وأبحلِق ساي

وأنطِّط ليك عويناتي