البيوت مرقت تعاين

البيوت مرقت تعاين

للسحاب الفوقها حايم

ما هي أصلا عارفه حالا

عطشة الزول لما صايم

السحاب ما قصدو شئ

غير يبلل حلق هايم

ويسعد الناس بي حضوره

تلعب أطفال البهايم

والسحاب ما عارف إنو

المدير بالأمر قايم

لسه ما فتَّح جفونو

في سرير النعمة نايم

السحاب ما عارف إنو

المساكين في الأرض

تامين حياتهم بالصبر

والحكومات بالعزايم

والبيوت المارقه هسي

ما هي مارقه عشان تعاين

بس هي مارقه عشان تحنس

الغبار الفار وقايم

والهبوب الشاده حيلا

على الرواكيب القديمة

الباقيه ضُل

للقوة في نص النهار

وبرضو شايه

للسخيلات والبهايم

إنو ياخي يحن عليها

ويحن كمان

على التكيلات العفيفه

العاست الكسرة ورهيفه

وسوَّت الملحات بطيبه

كفَّت الديوان كرم

من قهوة من شاهي وعزايم

والبيوت والناس جواها

عايشه إحساس الهزايم

مأسورة بالحال الصعيب

العندو والما عندو صايم

راجين فرج من الكريم

وعند الكريم الخير تمايم

السحاب عارف زمانو

بس زمان مسئولنا غايم

لا سبق في يوم دعاشنا

لا حسب جية الغمايم

28/7/2021