معليش يا عيد
غير معروف
معليش يا عيد
أسفين جدا ، لو جيت طليت
وما لقيتنا هناك ، في شارع البيت
معليش بالجد
لو جيت ولقيت ، سكان تانيين
ما بشبهو زول ، لا بني آدمين
معليش لو جيت ، وما لقيت أطفال
مالين ساحات ، شايلين ألعاب
ولقيت دوشكات ، وكلاشنكوف
وبدال الفرحة ، لقيت الخوف
معليش يا عيد
ما قصدنا كان ، إننا نرحل
او إنو الحاصل ، كان يحصل
كلنا فاكرين ، إننا راجعين
بعد يومين ، ومرت شهرين
والشهر التالت قال أمين
معليش يا عيد
بالجد أسفين
لو غصباً عننا ما فرحنا
عايشين والله أكبر محنه
بالهم والله مرقت روحنا
معليش يا عيد
إن شاء الله تعود
وعلينا تجود
تلقانا بخير
وسماء المدرمان
صافيه بيمرح فيها الطير
والقمره تغازل شارع النيل
إن شاء الله تعود
تلقانا هناك بي نفس الشوق
أعياد وأعياد ما فيها حروب
إن شاء الله تعود
تلقانا بخير