وين يا غايبة

وين يا غايبه ..

وين ركت طيورك بيكي ..

وكيف تميتي نص الحلمه ..

بى شرف الهنا المفتوحه ؟

أم بالأخيله الوداره ؟

ما هماني ..

واحد عندي ميتة الطلقه والحمى وكتلة الخلعله ..

كلها ميته ..

جته على الخشب مبطوحه ..

نايحه وسكلبات في الداره ..

وما هماكي تب يا رايحه ..

ما هماك عمر وبقضاهو ..

ما القاس البحر بى عرضو دون يفكر ..

بكون عداهو ..

والألم جرح بى جمره ..

في نفس الوكت .. داواهو ..

خط السكه مهما اتلوا ..

بنتم في محل مبداهو ..

وما هماكي ..

دا الليل هو البضخم حزني ..

ما الليل والمسافه قرايب ..

فالحين في نفخ إحساسنا بالشوق للبعيد الغايب ..

والشوق كوم قنابل خامله تتفجر وكت ننساهو ..

وكل ما اطراكي زي بنبش جرح ما انسدا