أمي
ياشعلة تِتْحدى الظلام
ياغيمة في شمس الضُحئ
ياشمعة ضوت من بُرام
جُوايا نُورِك ما انتهى
قلبِك مع البيت الحرام
في النور علاقة مُشبّهة
بهديكِ من قلبي السلام
يا أغلى من عين المها
لو قُلتَ عنِك في الغرام
كلِماتي ريدِك توّها
بتمنى أرجع من جديد
شافع في حُضّنِك ماصِحى
بتذكرِك وكت العِصير
عين الشمس في مغرِبا
راجعتي لي باقي الدُروس
بي إنشِراح مُترتِبه
سجادة من قلب السعف
ضافراها لي بالموهِبة
ماناسي لي رد الجميل
لكن جميلِك لي أبا
لو بمتلِك حيل الظروف
بختار طريقك مدرسة
كلمة جناي درس الصباح
عطفِك بدرِسو بالمسا
ريدك يكون الإمتحان
مابِنّجح الزول القِسى
عيدِك يكون الإحتفال
فيهُ الجوائز مُدهِشة
يا اُمي ياكنز البلد
يا دُرّة من جنة عدن
يا ملجأ الريد الخفي
من بارا لي أرض اليمن
انا في بُعادِك مالي روح
عايش مُسكّن في البدن
مهما تفرقنا الظروف
أنا قلبي في قلبِك سكن
وبشيل ملامحِك لي شِعار
واتحدى بيك كُل المِحن