راجين ترجع

تاري الأيام بتمرجح فيني

يمين وشمال

بتشل رجلي

وتشيل البال

الحس المال

غناك أعوج

وأنا محتاجة لمغراف مقدود

إنشل أيامي من الوجعات

وإتقطر شوف

شوف بالله الأيام راقن

ضاقن سكتن

سكتن سكنن

وسكن جواي شيطان حنك

ودا ما منك

مسلوبة ومغلوبة وهشه

وقشة

بتنخر في قلب ظنك

ولو مات قلبك مابنفشه

سرحت جوايا سريحة الموج

والموج سرح كم ضفرة ريد

والسحب إتلم

حرم

واحد مابتنى

وأنا شايله عجين أشواقي وألخ

والمخ

إتعطل في صورتك

والدمعه تشيل وتبخ

والدنيا قدر إندسى وراك

بتقول لي وووخ

وأنا أجري مطرطشة حفيانه

منتظرة أزاكر وإسترجع

وأحنس فيك يا أبوي أرجع

البلد إتلون إنسانه

والواطه الشبعت من النيل

صبحت عطشانه ونشفانه

الحب متوفر جوا الروح

والروح دبلانه ووسخانه

وحبيبي بدفق مطرة ريد

وأنا ديمة علي حن وحلانه

والهم متقسم للأصحاب

ومتعسم ضهرك بي جورم

هاك نورم

دام الدنيا ضلام

وتعال يابا

الشاي راجيك

والباب فاتح

مستني حضورك يوماتي

وأنا وأخواتي

عازمين الحله

غنا ولمه

وراجين ترجع