مد إبتسامتك

مد إبتسامتك

قبل أيدك..

خلي قلبك هو اليسالم..

والبسالم من قليبو

حس سلامو بكون مريح..

مد بصيرتك

طول مسيرتك

وأفرد جناح الرحمة

للعدو والصليح..

ما تسيب اليابا مدك

والبضربك ديرلو خدك

اوكما قال المسيح..

مد مشاعرك قدر بكرة

وضوي نور البهجة جنبك..

صافح الناس بي حرارة

بين اصابعك يهوي ذنبك..

كون مسالم

الغضب في الروح شرارة

لو تملك فيك قواك

حقو تقعد

خلي يهدأ ويستريح..

أوعى تاكل

من لحوم الناس وتضحك

خلي صمتك يبقى صفحك

والا عند الحق فصيح…

مد تراحمك الف باب

للبعاد في الحسبة منك

وللقراب..

لو بتطمع تمشي جنة

خلي في قلبك محنة

والبيقطع رحمو قاصد

قول نبينا: (يخش جنهم)

وفي حياتو يشوف عذاب..

زيد صلاتك لي حبيبك

وبرضو اكثر في المديح..

مد تراحمك للحولك

ادي جارك حقو برضو ..

ما تسب عيشتك وتلعن

وانت ناسي تأدي فرضو..

لو مشكك في وجودو

كيف تعيش من فوق لارضو!!؟

وهل بضير سير القوافل

صوت زوابعك والنبيح..؟

اوفي عهدك

عن … وعن

قال أمك..

ثم من..

تدخل الجنة الرحيبة

وتمشي بالدرب الفسيح..