مواعيد
من بدري شديد
والليل بيودع في الواطة وبيقول ليها :
وصيتك عشرة على روحك
ما تنسي صلاتك في الزحمة
وأولادك لو غلطوا فحقك
ما تعصبي واتذكري انك
شايلاهم وشايلين هم قدرك
النفس الموية ولقمة عيش
ما شرطا الا تكون لحمة
وفي الآخر أولادك انتي
ما تنسي عليك رب الرحمة
وباكر في نفس مواعيدنا
الشمْس صحت …
هنديك بي غادي بتتسوك
بتفكر في الراجي مروقا
وشوارع بيها بتتسلك
الراجي عشان يصحى من النوم
لراجي عشان يرجع بيتم
والصاحي وواقف في الموقف
مشوار الفتر الراجيهم وعنوان اليوم
خطوات في روحا بتتشربك
في نفس الموعد جات طالعة
حاجات الناس ما ممكن أبدا تتحنك
زي 12 كتمت كتمة
الشارح هاج
والناس فايرة
وصوت الطايرة
ودخلت بنوتة الكافتريا ..
وكانت نايرة
12ونص
هبت نسمة
رسمت في كل وش نص بسمة
وبعد ساعتين
الطلبة خلاص راجعين بيتم
نشرة أخبار
عربية التوزيع في الدكان
منى نزلت الحلة الفي النار
وصلاح قايم ختَّ الفنجان
في المعرض اترسمت رسمة
والشمس خلاص زي على مشية
وأظنها كانت نعسانة
مع حمرة عينا الملت الكون
اتكبكبت البت في الجامعة
دخلت إشبينة الكوفير
في المسرح اتحجزت خانة
وفي المشفى أظن طلعت روح زول
وانشالله تكون فوق فرحانة
أها…..
من فات الليل
وانا بتفرج
كل حاجة وليها مواعيدا
بالساعة وبالثانية وادقَّ
من فات الليل
وانا منتظرة
أنا وحدي الضاربة مواعيدا
وفيما يعنيك أنا أرهف من وردة وارقّ
وتشرني في جمر الساعات؟!
ضامن بي عيونك بتحنك؟
مربوطة عيوني على البيبان
من ويــــــن حتخش؟؟
ياربي أخت الوردة يمين !!
يمكن بي هناك
الأضمن اجيب تاني زادة
وين المبخر ؟
وحأعمل قهوة وشاي سادة
ما جيت لسة ؟
أبخر تاني !
وحوار رتبتو فــِ أفكاري …
تاني إعادة
الغنية
الرقصة
وفستاني
ياربي أغيرو بالسادة !
ووين الوردات ؟
ماتوا الوردات؟!
ما جيت لسة ؟!
ماتوا الوردات
ما جيت إنت
..
بتتأخر ليه يا محبوبي
ومن فات الليل أنا منتظرة ؟