مقاطع لحون

[1]

ولسه بْنَغَنِّي ونَغَنّي ونبوح

بِرّ الغرام التدسّو ويفوح

وكلْما يفوح:

تغنّي الحبيبة وتمدّ اللحون

وتشعل موسيقا المحبّة الجنون

فيلاكي غَنّي العواطف براك

وراكِ بنردّد هواكِ الحَنون:

يا كاتمة الأسرار

ليك سري دسيهو

ما هو الولِف كتال

يَصْعُبْ نبوح بيهو

[2]

وهسَّه بنغنّي ونغنّي ونقول

بإنو الوداد المُلْبَّدْ بِطول

وكلْما يطول:

بتنبع سماحة المحبّة وتفيض

وتملى البشارات مُنانا العريض

فقوماكِ نَسرِع نَغَّطْغِطْ وفاك

وندحر فضول العزول النجيض

الرّيد المُدَسْدَسْ

لا بُد من يبين

والفرح المُغَطْغَطْ

ما يصبح سجين

فِجّي الخوف وبوحي

قُولي الرّيدة وين؟

[3]

وبكرة بنغنّي ونغنّي ونقوم

ح نطلق سراح التلاقي ويدوم

ولحظة يدوم:

بنفتح لكلّ العوازل ممر

ويبقى الأفق للطموحات مشر

ويبقى اليكون يوم أقالد صفاك

ويصبح لقاكِ العتيق هو المفر

فقولي معاي يا مناي النبيل:

وداعاً أنين المُداراة التَّقيل

وداعاً لخوف الفراق القبيل

وكل المسافات ح تنبض مَقيل

وتبقى المحطات مقاطع لحون

وتقصر خطاوينا وين ما يكون

فأهلاً بنبض المشاوير سوى

ومرحب بمدّ العِنَاقْ الطويل

أم درمان – حي العرب

نهار الجمعة

23/ سبتمبر 2016م