منسية ساجدة

منسية ساجدة سجود… سهو

يا ناسية فرضك و هم نسوك

ما كلموك؟؟؟؟

النيل ضهب منك وكت يبطل وضوك

اتيممي وصليلي شوق

و استري عورة فكرتك ما تسرحي

خليكي واقفة مع النخيل اتوشحي

ريدة و محنة و ارشحي

يثبت غبارك امسحي

الأرض البكر تنت سنابل

في شوارع الرملة و القوز و الحجر

يا قاعدة و الناس واقفة فيك

شاربنو دمك و يلبوه

منسية ساجدة سجود سهو

اتذكري

شيليهو همك فكري

ما تسكري

اصبغي شعرك اصبري

باكر بجيك

اتيممي و صليلي شوق

ما تدنقري

ولدك وراك ماسك طرف توبك عشم

خلي الوهم

يا قهوة في ضل الضحى

يا قعدة حلوة و سمحة

داير معاك ونسة و ضحك

داير أنصحك

داير ابقى ليك مرواد على عيونك يمر

داير ابقى بيك طاعم وكت ما الحال يمر

داير ابقى بيك فاهم مع الناس الشتر

يا ناسية فرضك و هم نسوك واقفين عليك و يلبوه

منسية ساجدة سجود سهو