كبكبة

اتململت في القعدة
واتشهدت مليون مرّة
بخاف المحنة والزرة
لساني خفيف وقلبي رهيف
واكان قالت صباح الخير اقّرب اقيف
براي يوم داك رميت نفسي
طردت الخوف ده من قلبي
سألت السمحة مخطوبة ؟؟
قالت لي : لا ..لكن لييه ؟؟
سمعت قولة لييه تقول بندق
وقلبي الماسكو بين يدي قنّب يدق
ريقي نشف وحلقي يطق
شعرت القول تقول في حُق
اتململت في القعدة
بدور امرق
كان تاني سألتني لييه؟؟
كلامي راسو طار منو
واتقفل عقلي واتدبس
اتاري الخوف ده ما بندس
قريت الحمدو عشرين مرة
حتي قدرت اتنفس
اخوها قال ليها : ساكت بس !!
وعاد السمحة قالت كعبة
وانا السجمان رقم سبعة
الحر ..حسيت بالبرد
تقول قرفان مرق في البر
حاولت اقول باي باي
لقيت خشمي بي كماشة ما بنفك