حبيبة من الغنا

حبيبة .. من الغنا

انا عشت غربة مدوزنه

وكآبه تعمل دندنه

من حقي ياخ افرح كتير

اكتب حروفي والحنه

اسألني ياخ سويت شنو ؟

سويت حبيبه من الغنا..!

هي الدنيا كانت زي مغيب

والشم خلاص عملت كدا

فترانه او متردده ..

ما بين تغيب

او

ما تغيب

شفق المغارب ..

كان نحيب

نحيب الواطه والنخل الرطيب

لي حاجه رايح اسمها

تمشي وتغيب

تقعد قريب

وتهز سرير الذكريات

حاجه ..

بتلقط في حواسك وتاكلن..

زي الزبيب..!

احساس غريب..

لي حاجه..

رايح اسمها

لكن خفيف دمها

وانت بتحاول تنهرا

قلبك بدور تتذكرا

حاجه يااااخ..

بت المره..!

وما عرفتها..

وفي السمحه ديك ..

اللحظه جات..

في اللحظه ديك ..

السمحه جات ..

توبها اللخيدر ..

توب عجيب..!

شايل من النيل هيبتو

وشايل من القيف المخدر

اخضرارو وقجتو..

وشال من البستان ،

ما يحتاجه اللسان،

في شان يقول:

” ثوب غشيب” ..!

قالت:

سلام..

ما سمعتها..

ردو السلام ..

وسمعتها…!

نقيت حديسها العونكليب

فصين رقااااق

من سكرن

خدرن حواسي

وداير اغيب

وبشيش بشيش..

زي التقول داير اميل

مشينا بي احساس جميل

حمامتين بنقدو في الهديل

ومشينا من فوق للدريب

روحين بصفقو لي بعض..!

علي قدر دقات القليب

كل الكتبناو بالنبض

الناس بسموهو الدليب ..!

انا المظلوم وما قادر ابين

حسسي العليا كتمتو

في قليبي الحنين

” لا شوفتن تبل الشوق

لا ردن يطمن

اريت تبقى طيب انت

وانا البي كلو هين.. “

وسويت

حبيبه

من

الغنا..!

عجنتا طينها اللين؟

عذلتا القشوش اليابسه

وكل شيتن بعيب وبشين

ودربتها..

ومن شوك الكتر

بربرتها ..

حبيبة من نول الحنين

بي دم اناملي نسجتها

لجيتا بالغنا والسنا

ضوت اصابعي مسكتها

خيط من هنا

وخيط من هناك

من جاي لي جاي

جيهتها..

وكان الغدير

ملخص المويه الاخير

لسع صغير ..

يادابو كان

بس بملا زير

وفتيل كبير…

بحنان و ليفه ووردتين

غسلتها..

كانت بتبكي من الرحيق

الخشا عينها..

وبي رضااااي..

صدقتها..!

وكان غامته حاجه في يدها

مافيش مفر..

دغدغدها..

ووقعن

من خشيما الحليب

زي ضحكتين..!

تيربتهن

زيتون وتين

كيتا علي..

قامن مزارع عونكليب..!

ايدينا..

هل كانن حرير..?!

لا لا

مااااا اظن حرير

في حاجه بس في يدها

ليييينه

و

حنينيييينه

زي سلام الامهات

وكتين عليك تشدها

حاجه واحده

وما كتير

بتنعسك

لو قلتا ساي تعدها..

حاجه زي..

زي..

ملمس الغيمه النديه

لما الارض

عطش الارض

واشواقها تلحق حدها..

وسويت

حبيبة

من

الغنا..!

ما

الغربه

و الليل

و الضنا

و الذكريات المحزنه

الوحده

ووالهم

والعنا

السبعه اتحامن علي

كوركتا

آآآه ياااااربنا

ودقيتا دلوكت الصبر

و

سويت

حبيبة

من

الغنا… !

كلمه ..كلمه

وآهه .. آهه

نسجتها

شفااافه ابيض زندها

والراح زمااان من الحنان

لقيتو قاعد عندها

راتع في وديان الجنان

شارب حليب من ودها

وعمري القنع منو زهج

تاريهو لسع ما انتهى

وقلبي الوقع من الوهج

فجا النجوم في لبها

نص الكواكب والسنا..

وسويت

حبيبة

من الغنا..!

كل البشوفا معاي هنا

في قلبي حلاب الغنا

تحلف رويحتو تحبها

وحبيبتي مين البشبها

في

الطله

والروح

والبها

خلقوها

زي

احرف غناي

آخر اناقه وابهه..

وسويت

حبيبة

من الغنا..!