بعد تمشي الحبيبة
بعد تمشي الحبيبة تفوت
بتطلع في القلب آهه
وتنزل زي فحيح النار
وتفتح تاني مجراها
تدفق فيني سرسار شوق
وتطلع مني كم آهه
حبيبتي كما الشمس تطلع
محل تشرق تكون ياهه
وعادله كما الوطن وأكثر
بتجري دموع جواها
هي فاتت ولسته فيني معاي !
نفس مندسّى في الشريان
تفاصيل لي بلد تاني
عوالم لسته ما إزاحت
مدفقه فيني شوق وحنان
لقيتا بعد تعب طول
لقيتا بعد سنين أحزان
هي فاتت ولسته فيني حضور !
موقعه في محله زمان
فتحتها شان تكون ليها
وخشيت فيها بالأحضان
دفق صوتا الحنين قال لي
بحبك ولسته فيني كمان
شعارات لسته ما انكشفت
وكانت في الحقيقة إنسان
ملك فيني الدواخل شوق
سكن فيني وسكنت زمان
محل كل الصدق ساكن
محل كنا وطواني زمان
هي فاتت ولسته فيني تحوم !
محل تنزل بتشلع ضو
وتتمايل فرع نديان
وكل الناس معاها تسو
وتبقى المشية سيرة عديل
زغاريد من قلب مشتاق
وكم دلوكه ضاربة الجو
أبشر زيي زي الناس
وأجيها بعد سفر ممكن
أشيل من السبب شبال
وأسافر في أعز عيون
سفر دون سكه لا مشوار
واصل بي نظره للمضمون
ونصبح في جسد واحد
ولو جاز في الحقيقة نكون
أنا إياها روح واحدة
موحّده في الشعور واللون
هي فاتت ولسته فيني الشوق !
على الزمن القضينا زمان
على كل التواصل داك
على الفرح الصبح أحزان
وفاتت ولسته ما فته
ولا جرحي القديم جفه
ولا لاقيتا شان أرتاح
ولا كان المعاد صدفه
هي كانت لي كتاب مفتوح !
وكانت ريده بي عرفه
وفاتت ولسته راجيها
ولا وجعي الزمان خفه
هي كانت غيمة ما بتنسا!
وفاتت وفضلت اللهفه
حليلو زمن جميل عدا
زمن بلقاها مشتاقه
زمن لامن بغيب تسرح
وتنزل دمعه حراقة
تهدهد خاطرا الزعلان
تبلل حبه أشواقه
دى ريده ولسته ما كملت
بتضحك من زمن عاقه
فتر حتى الطريق والشوق
واخيراً ها الزمن ساقا
فضلت كما القتيل مذبوح
وكايس برضو نتلاقى