اسم الكاتب: ghaydood

زمناً منو يا ستَّأر خطير بالمَرَّة
فيهو قلوبنا ضاقت يا لطيف الزرَّة
الآيس تقول شيطان طلع من جرة
قالوا هجومو أخطر من قنابل الذَّرة

قدُر ما اتفاده ذكر امات سماح واتهرب
عقُب يتجدد الشوق والغرام يتسرب
الموسادو متمكن شديد ومدرب
فرتك لي بتاتاً كان منيع ومكرب

ماك القليل ضرب القواسي بحقرك
في الحر والدواس دايماَ متلب صقرك
بلاع الكبار في عيونو باين نقرك
اوعاك من صديق ان خذ إمكن إعقرك

اعاين في ريش النعام المغتي كتيفه
ولااشقل بالي مع الماتوجد في ديفه
ام فماً دعاش المزن التعقبو الزيفه
تقيلت قدم لكن في الـواجبه خفيفه

البيت الوراهو رجال وفوقو جرارق
حريمو معززات خلقة ونجمهن بارق
وحات اسم الله فوق عينينا نورهن شارق
ولا بحتاجن (السيداو) تجيب الفارق

قلت كبرت واستغفرت ربي وتُب
إلا حسسها دايما في النواحي بدُب
ما سمعوها يوم قالت شتيمة وسُب
عندها بسمة تنبت في القلوب الحُب

أغرب صدفه يومي الجيت ركبت الحافله
وجاورني الجنى الفاكرني بتا غافله
قالي ها ام سماح شايفك تقيله وجافله
قت ليه التقل وفيتو فرضآ ونافله

جزم ان ما البنات فوقن نظمنا غناهن
كنا نفوسنا من حلو الوجود لغناهن
لذاذة صدهن للجوف نبال وغناهن
احلى من القروش في عدمها ولا غناهن

الليلة البلوم اصبح يقوقى وينوح
وميزان قلبى اصبح من بكانو مفوّح
على بـهماً لِوَيِّنْ بى النتيل مِسَّوِّح
لى شوفتو بترد الروح بعد ما تروّح

في الضواحي وطرف المدائن
يلا نتظر شفق الصباح
قومو خلو الضيق في الجناين
شوفو عز الصيد في العساين