اسم الكاتب: ghaydood

إنْحَلَّ آام كُحُلْ بعد النَّشَاف كَرَّابِكْ
وجاكي الفَرَّحِكْ مِن هَمْبَريبو شَرَابِك
يا القَلَبَنْ رَشَايْمِك وَدَّرَنُّو سَرَابِك
ويا الزَّرْقَن سَمَاكي الليله عِيدي شَبابِك

زَمَنَّا قبيلِ خَمَجوهْ وعاشو فيهو رجال
زَمَنَّا قبيل زمان البُرْقْ بنات دَبَّال
سيدهِنْ مِمَّهِلْ ما براعي لي المُرْسال
وياحليل الدَّليلهِنْ سالم ود رَحَّال

يابادي النّجُوع ما شُفْتَ خيرالسيد ؟
قطّاع الفَجاج فوق المِصاعو جديد
شَلَعْ الحوش وقام مِن الطّويشه صعيد
دي الوَلَد البِصوقِر في البَطيحه رشيد

جَقْلَه ليها مأوَّلْ
اُم شَحَماً كالْ واتْعَوَّلْ
دورْهِنْ دَرْمَسْ طَوَّلْ
لِقِي ام كُرْبيلاً نَوَّر

عجّال دكّه مِتبارين قَدُر ما نتَلِّب
وما فينا البخف قلبو وجِليدو بكَلِّب
ماخسّانا كان بِتْفِز وكان بِتقَلِّب
حَدْ ماترسي فوق عرقوبها سوطنا بعَلِّب

فِرْحَتْ كُرْدُفان جاها الخريف اللّيِّنْ
ربوعها جميعو بي توب الخضار مِتزيّن
بَرّاقها البِعَرْجِنْ مِنْ بَكانْ لي بكيِّنْ
يِعَتِّمْ في مكاميش مِزْنَها المِتْحَيّن