آمال مقيدة
شلة مكافحة
قرروا أنهم يقروا الجامعة
واحد طلبة وواحد بنَّا وواحد كافل أختو الشافعة
وواحد لافي ولافي ولافي وما لاقيلو شغلةً نافعة
واحد بحلم بالمستقبل، تنمو شتيلة الحلم اليافعة
ممكونين
وكل واحد حاضن آهاتو
ومحرومين
من الآمال البيها بِهاتوا
بس صابرين
وعارفين أنو الجاي حيفرح
ومتناسين
الحسرة على السنوات الفاتوا
جمعوا الفيها نصيب واتلاقو
وعينيهم للأفضل طامحة
ومشوا قايداهم شعلة طاقة
وحب للعلم وأمل للجامعة
بس اتفاجئوا بي واقعهم
صدمة قوية وقاسية وواقعة
وفجوة كبيرة اتختت ليهم
ولي أحلامهم صِبحت مانعة
التعليم بقوهوا تجارة
تدفع تلقى، وتدفع تدفع
مليار داخل ومليار مارق
عسى ولعلَّ يكفي وينفع
كل تاجر بيزيد على كيفو
وفيو بمزاجو بيرفع ويرفع
والناس ساكتة وسامعة وشايفة
وما بتحاول تردع وتمنع
من حقي وحقك يا طالب
ومن حق الناس الباقين
حقنا ياخ في إننا نقرأ
محل ما نحب ما دام دايرين
ومن حقنا إننا نحتجَّ
نوعي الناس الما واعيين
نصيح بالحق نرفع أصواتنا
ونبقى وراهو لحدي يبين
وما نسكت عن حق مكفول
وما نعيش دور المحرومين
بل نبقى سبب للناس الباقية
يصيغوا حلم كان ليهو سنين
زي أخوانا الشلة الحالمة
وغيرهم في كتير ما لاقيين
بس ياريت لو نوعى شوية
ونبقى جدار بيصُد الفاجعة
نرجع حلم الناس بالقوة
نخليهم يقدروا يقروا الجامعة