الدنيا سيبا قبل تسيبك
ديمه صلي على حبيبك
أصحى قوم يا ناسي عيبك
كن حذر احترمو شيبك
أبقى واصل لي قريبك
خلي كل شيئا يريبك
من حرام لا تملي جيبك
لا تقول لي ياخي سيبك
خاف إله الناس حسيبك
والدرب لا بد يجيبك
اسمعوا نشرة تمانية
بتعرفوها الدنيا فانية
الرحيل في كل ثانية
والجميع لي قبورا دانية
يا زميل لا تكون ضحوكا
ديمه جالس البنصحوكا
ود عمك وناس أخوكا
بالتراب ما برحموكا
يا زميل الدنيا هابا
أصلو ما بتلحق رهابا
زايلة زي ضل السحابة
وكان تدوم وين الصحابة
لي طباعك ديمه حلي
والبعاديك سامحو خلي
في ظلام الليل صلي
منها لا بد تولي
القبير والله قاسي
فيهو ملاكا تواسي
الحساب بي دقه راسي
يجيبوا ليك الكنت ناسي
في القبير يا أخوي مصايب
منها الشاب يبقى شايب
أمانه ما تشاهد نقايب
يجيبوا ليك البدري غايب
الدنيا قط ما بدوم حلوها
زايلة واطيها وعلوها
كم عروسا جرتقوها
بالتراب زين تندلوها
القبير للكل نهاية
والجميع لي بيتا جاية
من كتاب ما حفظنا آية
يا الرسول دايرين حماية