أبوي لسه حي
أبوي لسه حي
سامعه صوت التلاوه
ضايقه طعم الحلاوه البيهديها لي
وأبوي لسه حي
أبوي فقدو بوجع
بطمن قليبي و بقولو طيفو برجع
وكيفن أمسو
دا طيف ساي بحسو
وكت شوقي يغلب بضم وجعي ليا
وأبوي حاسه فيني
بقول لحروفي بصاف كيفني
دا علمني ديني
ودائما بجيني
ويكحل لي عيني
بنور من إيمانو
ويشيلني بحنانو
ويطبطب عليا
ويقول ليا قاعد
قدر ما ندهتي لرويحتي بتساعد
تجيك وإنتي أحكي
أبوك لسه قاعد
رويحتي بتسندك
نصايحي الزمان لسه داخرها عندك
بنتي وبتفهم كلامي وبتجبر
مشيت سبت زوله قويه وبتصبر
ح تقدر تعيش في زمن فرحو بندر
كلامك أبوي البجيني
بيطمن بخلي عايشه
رغما وحات ربي لسايا دا يشه
بواسيني خوفي ..
بتوجع ظروفي ..
بفضفض معاك
يوم تجيني في حروفي
معاك بس أبوي مابطش مني
شوفي
بحاول قدر ما أشوفك أضمك
وأحس بيك معاي
جسد ما رحل لسه قاعد حداي
وكل ما أحس
بالظلام بحتويني بضمك شديييد
وأصبر رويحتي وأقول للمعاي
أبوي مابعيد
أبوي شايفه فيني
وماليابو عيني
وقاعد قصادي
بوجهني في كل خطايا
وبقول لي إذا غلطتي عادي
فعادي الغلط منو ببدأ الصواب
وأظن ساي بطمن قلبي بجواب
و أبوي ماهو عادي
كان زول قيادي
بفض النزاع في الخلافات حيادي
وأبوي قبلي يرحل ويفوت قال لي ماش
وياريتو لو كان قعد لي وعاش
كان همي فاتني
ولا الوجعه جاتني
ولا كان فراق الفرح سد خانتي
وأبوي سيرتو تلمع
ولسايا بدمع
فراقك أبوي بكى عالمنا أجمع
أبوي شايفه فيكم ندهتو ويسمع
أبوي قلبي من فات حلف تاني يرجع
وآآآه من فراقك أبوي ليا أرجع
أبوي تاني برجع ؟
سؤال مر إجابتو
وقاسي في كتابتو
أبوي تاني برجع ؟