الصيف انصرف
الصيف انصرف جانا الرشاش وهبايبو
براقو البلوح الحر طفاها لهايبو
رف وساق ورزمن فوق قصيره سحايبو
صب مايا كتير والفيخ نفاها دبايبو
فقه الوادي لا عند الغبيات جايبو
مطمر عيسي من التالته عشي ربايبو
رسلو للقلب عرب العوالي حقايبو
درفونا نجيض فوق البسوكه نوايبو
أمسو بعاد من القصب الكبارا زرايبو
دايرين قش بطانة الناقه يرعو مطايبو
شرب الطين وحامن للزراعه ركايبو
أكبر وادي فوق وسحبو يرعد رايبو
سيد بقره وغنم نبت الملاين هايبو
يخشي من المطر يهلك عليه حلايبو
ضعنا داقه جراستو ومعقد شايبو
شب فوق العليو الحرقني علايبو
سيد المال يصدف في الخلوف وضرايبو
حرات المسور هامو العمل ما بغايبو
مكلوف خيل بني الشايقي البنفي سبايبو
من زيف عفرت البراق مرمي لكايبو
دوام الحال محال جانا الخريف وعجايبو
والعيش في الديار شفناه تندي لتايبو
نزلت حبة الرخا لينا عامه تسايبو
والراعي الله من جور الزمان ومصايبو
