بي حبي وديتك

بي حبي وديتك مكان ..

و رفعتك أعلى من الغيوم

غطيت عيونك بالحنان ..

و سميت عليك كل النجوم

خليت هواك لي دنيتي ..

من غيرك ابدا ما بنوم

خليتني اندم اني يوم ..

حبيت زيادة عن اللزوم

ما كنت عارف كيف تريد ..

و الريدة عندك سر كبير

وريتك الحب و الغرام ..

و بقيت من الاشواق تطير

وشرحت ليك لغة العيون ..

و عرفت كيف الزول بغيير

مالك كبرت علي خلاص ..

و بقيت تفتش غيري غير

خليت عشانك دنيتي ..

و بنيت علي عيونك قصور

و فرشت في قلبك هواي ..

و زرعت في خديك زهور

خليت عشان عينيك عيون ..

خليت عشان بدرك بدور

و تسيبني في عز الضلام ..

و انا كنت بهديك قلبي نور