بي باب الحوش
إسلام النحاس
بي باب الحوش الوراني
حسيت بي صوتك ناداني
لفحة التوب فردة مركوب
كسار الطوب خرش شوقي
وانا دايرة اطير
لا شايفة الناس لا شايفة الغير
والوحشة تتلب من فوقي
قلبي الخمجان زاد دقاتو
يا رعشة خلاص اهدي وروقي
ووصلت خلاص لي سيد الناس
الكل والساس
والوحشة فعيني مطبوقي
يسلم حسك
يا المن الناس ناوية ادسك
كيفن قضيت اليوم بقفاي
سرحن عيني في طيفك جاي
حضرت البيت
حمرت الشوق بي باقي الزيت
فرشت الليل للغالي سرير
رشرشت الحوش من موية الزير
نامو الشفع
مالك عكران ؟؟
صنقر وصنقع
قال لي همي فات المرجع
قتلو قول خير الخير برجع
والزاد في الزاد باكر بنفع
يا سيد الناس شوفتك منبع
وان قصر الحال عينيك تشفع