هو دا ياتو ليل
هو دا ياتو ليل
بقدر يلم قلبي المحب
قنديل هواي
النورو ضاوي درب درب
وحبيتي مشوارً صعيب
داير كرب
واشواقي فاضاً سلسبيل
وغرامي ضاق بيهو القلب
ريدي الدفين
الفيني شاني علي حرب
….
يانار هواي خلاص كفاية
بدور افوت مني انسلب
داير اعيش مع زول سواي
انسان جميل ورقيق محب
داير اضوق الجنة يوم
من ناري جد انا تب تعب
ما اظن كتيرة علي شديد
لو مرة حالي انا ينقلب
يافرحة زوري دياري يوم
خليني منك اقول شرب
طليني زي باقي الخلق
حسيني ساي لو بالكضب
خليني بي سيرت الحبيب
افرح واغني وانطرب
بي اسمو بي جسمو الندي
كيفني ما بمرض واطب
بي لونو بي محيو الرضي
وفتاك لحاظو وقت تصب
من فاهو يا ثغرو الوضي
بسمو الخجول الما نضب
الريدة كيف لو ما كدي
وقصة هواي كيف تتكتب
ودا حق امبارح مع كتيابي
أي شوقٍ يا صغيرة
قلت ليها
أي شوقٍ يا صغيرة
هذه الروح تثنت
خفت الوجد الذي
طالما بث الضياء
لها كثيرا
عبث الظلام بروحها
في حين حين
اوتلمين
خبئتني في ثناياها وأنَنْتُ
ثم هامت وفجاءة همت
زي كأنها قادة تلفظ
في نَفس نفِسا الكسيرة
وزي كانها كوخ مضلم
مرمي في نص الجزيرة
وحي كتار يا… ما كتيرة
فياتو شوق ياخ ياصغيرة
ياتو شوق يا ناسية اني
يوم هويتك كان كأني
مضيت عهود علي ذاتي مني
ارتضيت اتسمي بيك مجنون
وبتعهد وبدفع عمري ليك
وهواي وقلبي وامنياتي
وكل شي
ماكان بينفع اختشي
وحيات عيونك ديل
عشان هن بس عنيك
بيهن بدندن منتشي
يا الانتي مني وكلي ليك
سكت شان خفتك تجني
وقلت لي ما قلت كيف ؟
انا يوم وعدتك كنت عارف اني وافي
وحتي وعدي زهج اظنو
عارفة قالي انت عايش
في زمن بقي اسي مافي
برضو قال لي اصحي ياخي
يا خرافي …
ضحكتا فيهو
انا كنت عارف اني
شانك محتويهو
كنت حافظك وحافظو منو
ولما يغلط بي حنينك كنت افنو
واسي مافضل كتير
والباقي منك ما هو كافي
والزمان النحن فيهو دا جد مخيف
اصلو داك عنوانو باين في جبينو
الخيانة اولاً
بعدين يسموك الحريف
انا كنت عارف كل شي
ما كنت خايف او ضعيف
انا كت نضيف والله نضيف
فدا ياتو شوق ياخ ياصغيرة
المابدسك من وجع زي الخريف
بلاي اقيفي عشان حروفي
معاك تقيف
انا داير اقيف
مليت خلاص
وزهجت من هذا الشفيف
وانتي الخلاص
وانتي الاخيرة
وهكذا تمضي الليالي بيننا
او علي تلك الوتيرة
فاي شوقٍ ياصغيرة
عن أي حب تبحثين
جف الهوي سقط الحنين
ولقيت دواي انا في الغنا
وكل ما زاد العنا
بلقاني قلت جواي انا
ما ني البطاطيك ياجبين
شان ياتو شوق ؟
يلقانا وين؟