سمعتي صمتي
سمعتي صمتي ؟
طيب اسي غناوي حسي
غناوي راكزات ام سهت
انا غايتو شايف بين عيونك سحنتي
سحنة من المداين الما إنتهت
اتنبهت سمت الحنان
نبتت جناين لحظة الطيرة اشتهت
موز برتكان او سيسبان عود سنديان
واغصان تلين كلما روحك تنور كلما نجمة ازدهت
في يد زمان مشتاق يغنيلك امان
والخوف ضلام لون السواد فيو انبهت
سمعتي صمتي
……
سمعتي صمتي
في المواكب السايرة في حضرة ضياك
ام في القلوب مخضرة حولك من صفاك
في الرتاين الرافعة نورك لي سماك
ام في الغصون زيتونة ورد من نداك
وفي شذاكِ ام في علاكِ ام في رؤاكِ
انا غيتو قاعد فيكِ براكِ ولا سواكِ
فيكِ حياتي وفيك هلاكي
فيكِ فيني بدوم هواك
حين ابقي بيك وما بلاك
سمعتي همسي؟
شيطانة انتي ؟
ولا انتي ملاك … ملاك
…….
سمعتي حسي
لما ناديتك تميمة الفرحة ضد العزلة والنوح والرحيل
تعالي علي ناديتك تمدي الضل
علي روحي المشمسة حين جسد مسوم عليل
حلي الضفائر كان تجيب من جيهة نسامك عليل
فري ابتسامتك ورشي ضحكة وهيطة شان يحلو المقيل
انا برشي بيك كل الحزن جواي وبيك بصبح خليل
وبغني بيك عازة هواي وبلجم الشي المستحيل
انا بيكي وحدك ببقي سوداني واصيل
سمعتي حسي؟ سمعتي هسي ؟
ولا من زمن المحنة الليك غَنا غُنا امتحنا
غنا مصطفي غنا وردي ابو الامين شال عودو رنة
والقماري التبني عشها قشة قشة بتبني جنة
الطيور الراحلة والحزن القديم والقالو عنا
المدينة الفات زمان الجاي بكرة ويا اهلنا
الذكريات انا امتي ارجع وتمي دورو واهِ منا
سمعتي حسي سمعتي صمتي
سمعتي بكراي ولا امسي
سمعتي عني ولا مني
سمعتي ايه
قولي عشان اصبح حبيبك للابد
اصبح سميرك وفي سمارك
يطيب جلوسي و فيك امسي
سمعتي همسي؟
طيب خلاص
ارح نغنيك يا بلد
جيبي نَفَسك
هاك نَفَسي
أنتي نفسي
انتي امي
نادي هسي علي
قولي يا ولد.