يا سيل

دحين يا سيل ،

ولا قحّيت لهِن ساكِت ،

عشان يِختَن طريق جَيْتَكْ ؟

ولا طَقطَتَ ، لا صَفَّقتَ ،

لا هِن بي وصولَك حَسَّنْ ،

ولا اتلافَنْ هَدِير موجَكْ ؟

بيوت الطين ،

شَقا السنوات ،

عَقَاب حيطان ،

أُوَضْ كاسِر ضهُورِن شَقْ ،

رواكيب نُصِّهِن ناصِل على الواطَة ،

ولا ساي فَرَّزَن رِيحتَك ..

وحاج احمد ،

مَرَق من طاقَة الصَّبُر الوَسِيع بالضِّيِق ..

خَرَتْ جِلدُو ،

ودَفَن طوريتو في جدوَل دميعاتو الأبَت ما تْكُب ..

حَتَل في ضُلُّو ،

وانتَكَىٰ في مِرِق رُوحو ،

ونَتَح في قلبو باقي عَصب ..

ونَدَه يا حيل ..

ويا قدرة شوارع الموت ،

عليك بالسّيل ..

يا الحوش المَمَحَّن زِح علي طوبَك ،

اقِيف لي السّيل ..

ويا الهَمّ الكِبِر بلحيل ،

تعال ادفُر مصايب اللّيل ..

يا الحَبّ المَعَلّق في لَهَات الطّير ،

اقَع في الجّوف ،

اكان يبرُد حَشانا قلِيل ..

دَحِين يا سيل

اكان حَوَّدتَ غادي قِبيل ،

وكان تَمرُق علي الخيران ..

دَحِين كان جيتنا بي ميعاد ،

علينا تدَقدِق البيبان ..

بَدَل ما تْخُشْ

تَكُش الراكزة والسايْبَة ،

وتَخُم الفي مطامِيرنا ،

وتَشِيلو تَمِشْ ..

اتاري الغيم بِصُب عميَان ..

وجِيت يا سيل عَنِيد وصَبِي ،

لا اتْنَحنَحتَ ، لا طَقطَقتَ لا صَفَّقتَ ،

لا دَربَك مَشيتبُو عَدِيل ..

عُقُب لا بُدَّ نِتحَمَّل ،

لأنّو الجاتنَا مِن رَب العِباد ، لي خير ..

يمين نَرضَىٰ ، ويمين نَقبَل

ولا ح يطول حُزُنَّا كَتِير ..

وباكر نِحنَ تَب راجعين

علي بيوتنا ،

ونَعَمِّرَا تاني بَعد السّيل ..

ونقول ان شاء الله تَبقَالنا البَلَد بي خير ..