جات ماشة

جات ماشة فى باقى الناس ,

لمن تكون يا دوب صحييت ..

ما تمّ وعيك بى المكان …

كده زى بداية كلمتين ..

( بتمغّوا ) فى طرف اللسان ..

رشتنى بى خَدَر الحنين ,

زى لما تسمع قولة : إششش

حولك .. نظام صُنّة أذان ..

ما دقت الباب شان تخُش ..

أنا جيت على حوش غربتى ,

و لقيتا فى الأحزان تَقُش ..

ده كلام خطير ! ..

عرفت هى كيف عطش الحنان جوّاى

و جابت ليّا زير ؟؟

و لقيتا غسّلت الحِلِم ..

شرّت حكايتو هـِدِم .. هـِدِم ..

بت الحلال ..!

أنا كنت قايلو خلاص قـِدِم

من رَكنة العمر النِـدِم

فى مخزن الوعد المحال …

ده الكنت جادعو مع الفرح ..

بى إيدا فرهد و إنشرح

بقى لونو زى خاطر العيال ..

الله على هذا الجمال ..