غيمة تشبه حسن ظنك
يا حبيبةْ…
عندي فكرةْ…
لما أرحل مني بكره!
نسبة الحلا قلليها
للبشوفوك أبقي شطة
ولي خدودم بي دموعم بلليها
واحرقيهم كيه فيهم
ولي حياتك…
بي طيوف مني ابتجيلك
دلليها
فاكره لمن جات مطيرة
والشمس زعلانةْ منك
كان في غيمةْ ومافي غيرا
غيمةْ تشبه حسن ظنك
ماشطه بالقطرات ضفيرة
شايله دربك وكايسه عنك
حابسه ريدك في ضميرا
وليها كم صحرا بتحنك
إلا جاتك غاسله روحا
بابتسامتك وعامله حفله
فاضحه عطرك جوه شالك
في سبيبك عايمه طفلة
شاقه روحك من خلالك
وبي وجودا معاك بتحلى
فاكره لمن جات مطيرة
وكنتِ حفيانه بتتاتي
لابسه فرده وشايله فرده
أحلى بنوته ف بناتي
كان في دربك نابته ورده
غرقت بالريد حياتي
كنتِ غزلان غاويه شرده
جوه روحي وغاوي ذاتي
قلبي لو سرق ابتسامتك
أعفي ليه دي حاجة حبه
ما عشان هو سرق حرامي
مش أنحن كمان أحبه؟!.
ياخ دا مسكين ساي بغازلك
ولما تغمزي بستخبى
قلبي كان زول الله زاهد
إلا غاويك في المحبة