ست البنات
العلواني:
اعاين في ريش النعام المغتي كتيفه
ولااشقل بالي مع الماتوجد في ديفه
ام فماً دعاش المزن التعقـــبو الزيفه
تقيلت قدم لكن في الـواجبه خفيفه
الوسيلة بابكر:
ست الــــــبنات الفى المدن والريفه
ناعسه كواحل وحالية لهيج وظريفه
شن تشبه برا الشتله المجاوره جريفه
حبــــها فى كامن ما لقيتلو صريفه
العلواني:
صــدراً عالي والحشا خلقه نحيفه
عفيفتاً من الرزيله صافيه نضـيفه
الشـاقل بالي وفي المنامات طيفه
انا ياوسيله ناقصــاني بس الكيفه
الوسيلة بابكر:
غنانا عليك حقيقه حاشا مو تزييفه
وقلوبنا عليك تهاتى وليك ديمه وليفه
اوصاف محاسنك ما بتدور تعريفه
مضروب من عيونك نشابا داك وسيفه
الُْعلُوَانَيَ:
قصيبة التمـــم لي طينتها خريفه
ماذادت فوق جمالها ولا تكلــــيفه
ان قلت اوصفها مابنجيد توصيفه
وان غاب القمر هيا البتبقۍ خليفه
الوسيلة بابكر:
قصيبة التقنت المرنوعه ديك وعفيفه
ما وصفوها بى شينه وديمه نضيفه
محمودة طباع ظبيه ملازمه طريفه
دره وزينه نادره منو البطاول قيفه
العلواني :
ام جسيـــــماً مابيحمل جر الليفه
نــــذره مابتـوالف البدور تـوليفه
عفاف ام عيسي العـروقها رهيفه
امامن فعل المنكرات عيونها كفيفه
الوسيلة بابكر:
اب وزنا تقيل حاشاهو من تطفيفه
مخزونا قديم زايد كمان تلصيفه
غناى الفوقا مو دايرلو تب تصريفه
مرصوصا مقعد خاتى من تلفيفه
الُْعلُوَانَيَ:
اتقـل من اقولو تقيله ماها لفيفه
البنات في كفه وهيا كفه شـريفه
رقه وذوق ياخي حاجه ظـــريفه
ان وقفت جنب الريان تطلعه عيفه
الوسيلة بابكر :
المقسومه من هافا وماها رهيفه
مربوعة قوام سمحه وسمح تصنيفه
ملخوخةتموع وفى المشيه ماها رفيفه
يا العلوانى بتجيد قافيتك توصيفه