عجبي

عجبي البت وقت تسمع كلام واليها
و عجبي الأمو مشتاق لي طعم شاهيها
قلبي مكجن النزعت حياها الفيها
و البت البتضحك و الرجال حوليها

عجبي الما بجيب قرش الحرام لي زادو
و عجبي الراجل البعرف مرامي بلادو
قلبي مكجن الولد البفك مشهادو
و الراجل البقيم بتو فوق أولادو

العز ورثة.. والبيت غير مِرِق ما بقيف
والصيد حرفة.. والنيل يا محمد قيف
العز ورثة و العز في رباية الريف
وتربية الدلع.. ما بعرفو كرم الضيف

القرآن فصيح للقاري بيسهل درسو
و العيش برضو للزارعين بيسهل غرسو
الزول البشوش بضحك لآخر ضرسو
و البيت أب بنات يا ماجد إلا تحرسو

عيب السرقة .. فاعلها في الحرام بتورط
و المسمار أكان حلج أصلو ما بتقرَّض
الصفق إن يبس من غير سبب بتعرض
والمال ورقة .. بي طول الزمن بتشرَّط