قوم نعافر و نركب نسافر
لي مدينة الخير والجمال
يا مُجافي وديمة أنت نافر
وفي حُطام الدنيا بتدافر
أترك الآمال و أبقى دافر
لمدينة الخير والجمال
أترك اللّذات الدّنية
القُعاد و النومة الهنيّة
أعقد الآمال سوي نيّة
لمدينة الخير والجمال
نعبي زادنا ونترك بلادنا
الأهل والزوج كل ولادنا
نوفي مايلزم لميعادنا
للقيام لمدينة الجمال
نوصل المختار جوة سوحو
نفشي شوقنا ليهو ونبوحو
ننسي للاسقام والجروح
في مدينة الخير والجمال
عن بعاد الساكن شروقنا
ما بيصح يتطاول فروقنا
الرسول الطال ليهو شوقنا
في مدينة الخير والجمال
المدينة الحاليات مقيلا
فيها سندي الشايل التقيلا
يصلح العترات و يقيلا
هو أساس الخير والجمال
طِيبا حالي وطَيبات ثمارا
الحبيبة العاليات منارا
المَنوّر بنورو نارا
وعَزّ ليها مدينة الجمال
حاشا ل الدجّال مابيجيكي
كيف يجيكي و رسولي فيكي
في الجمال قط ما ليك شريكي
إنتي أصل العز والجمال
لي بروق من ناحية بِلُودك
ذكّرتني المن جودو جودك
جمَّلك بربُاك وحدودك
وكمّلك يا مدينة الجمال
الصلاة لا حد لا نهاية
والسلام مصحوب بالتّحايا
ود كنيش خدّام ليهو غاية
الجوار فى مدينة الجمال