عَقلي جالَ اليوم
لِلفي المدينة ومال
صِلني يا مَحبُوبي وأعطِني الآمال

يا الشَّغَلني هَواك ولِغيرو ما لي بال
في مَنامي أراك أنا لي فيك آمال
يا رسول الأُمَّة أنا بُعدي مِنك طال
لامَتين إتْحَلْحَل مِن ذنبي العَطّال

أوصلك وفي الرَّوضة ألقى كل منال
وكُل هُمومي تروح يا طاهر الأنسال
وبوصالك ووَصْلك ألقى منك إيصال
كُل مرّة أجيلك في المقام حَصّال

يا مُديم البِشر لي إنت أغلى منال
يا الخَرقت لحُجبك وليك ظِلًّا مال
لم يَبِن في الأرض ليك فَيٌّ وظِلال
إنت أصلُك نورًا تُضوي كُل مجال

يا رسولنا في حُبك نَحن ليك عُمّال
ما بنضيع بوصالك وما بنكون هُمّال
أروِينا مِن حوضك يا غاية الآمال
الجميع في حِواك العَديل والمال

يا شفيع الأُمَّة وقائد الأبطال
أمَّتك في غُمَّة وحالها جِد بطّال
إتكالبت أعداها عليها بالأنصال
لا وجيع لا مُناصر وليلها الحالك طال

النَّسيم مِن بلدك هَبّ نَسَّم وشال
المَنام مِن عيني وغَيَّر الأحوال
غير أزورك لِمقامك الرَّوقة مافي محال
ألقى راحتي في قُربك وينصلح لي الحال

ليك صلاتي سلامي غير عدد هَطّال
تمحي عَنّا ملامنا وكُل شي بطّال
مِن كنيش الرَّاجي الوصل غير فِصال
يلقى بيها إمدادو وبيك فروعو تُطال