صَلّوا يا حُبور لِلنَّبيِّ المَنصور
المُدَّثِّري لِيه زاد حَسري
أوَّل الكَلام بِشَرعِ المَسطور
بِالغَنيِّ المُريد فاعِل الأُمور
مالِك المُلك فيه ما بيشور
كاشِف البَلاء ودافِع الشُّرور
غايِث الدَّواب جُملة لِلطُّيور
مِنه لِلعِباد يَنزِل المَقدور
سِترُه الجَميل سابِلاً مَشرور
توبوا يا خَلوق لا نَموت بِالفور
اتركوا المَعاصي وشَهادة الزُّور
نَحن مُذنِبين والكَريم غَفور
أثني قَولي لِي سِيدي المَنصور
شافِع الخَلوق يَومَة النُّشور
يَوم حَيارى مِن ضَبَّة القُبور
شاخصين عُراة والجَحيم تَفور
صَنت الهَجير فايرة كالقُدور
صَفَّت الأنام والرُّسل حُضور
مَطلبن جَميع لِلشَّفيع نَدور
عيسى قال لَنا ذاك سِراج النُّور
نَجري كالظَّما الغابة ليها دور
شافَنا قام وَقَف أحمَد السُّرور
خَلَّص اليصيح في العَذاب مَزرور
جاه شامِلاً لِلعُصاة يَتور
أصلُه سابِقاً خَمش نُور مِن نُور
مِن أبيه في آمِنة بان ظُهور
لَمَّا جا الوُضُوع بانت الأُمور
حاضِرات نِساء وبِضعة مِن حور
نَقياً مِن دَم طاهِراً طُهور
خَرَّ ساجِداً لِلإله شَكور
فاحَت الأرياح مِنه والعُطور
نورُه ضوَّا الكون وخَمَد البُدور
فَرِحَت السَّماء والأرض والبُحور
شاشَت الحِسان لِيه في أُم قُصور
نارَت البُلدان وطابَت الدُّهور
زالَت المَسوخ بِيه والنُّكور
شوف حَليمة ليها النَّعيم مَدفور
رَضَعَته يا نِعم ها الشُّطور
صايبن قَحط والحِمار مَكسور
بارَك الزُّويد ليها والفُطور
هي وحَليلَا صار خاطِرن مَجبور
يَمشي في السُّروح يالفوا صَيد البُور
خَضر اليَبيس حوله والثُّمور
الملايكة جَوهو في خَلا العَتمور
شَقّوا صَدره وتمّوا قَلبه نُور
ضَمَّره شافه راح خايفاً مَحرور
كَلَّم أُمَّه جات تَجري كالعُصفور
في جِبال حِراء لَقِيت الصَّبور
فوقو هيبة لا هَم ولا كُدور
أصلو في قُريش عِزَّه كان مَخبور
جودُه فاق على وابِل المَطور
كَفُّه الشَّريف يَنبَع النُّهور
لانَت الحِجار تَحته والصُّخور
قايِماً باللَّيل لا ورا السُّحور
جوفُه جائِعاً بالصِّيام مَهجور
بابُه فاتِحاً حاشا مو مَحجور
مِنه السُّؤال ما بيصُد مَقهور
في الرُّسل جَميع مالُه ناظور
بي كَرامَته فاق لِي نَجي الطُّور
يَدخُلوا الجَميع في القِنا أب تابور
تَبِعو الكِرام ليها كان يَشور
ديمة في الجِهاد صَفّهم مَنصور
صَبَّحوهو عَوق النُّجوس مَكبور
تَلقى في المَحاص عاول الفاخور
جُملة أب غُبار في العَجاج مَحدور
تاكُل الكِلاب فيه والصُّقور
كَم مُجندلاً دَمُّه سال ناسور
كَم مُعقرباً في الحَديد مَسجور
هَدَموا الصَّنامات مع الكُجور
عُوزِبوا النِّساء وعدِمن الذُّكور
دوبا لِلجِنات بَدروا المَسور
جالِب الرِّجال مِن صَليح وفور
هَمَلوا العِقاب وقَبِلت تَكرور
يا كَريم تَحِل قَيدي أب ساجور
نِعمة يا اليقوم ليهو بالمَجرور
يَنزِل القَصير يَكري لا مَديور
يَرسي في الشُّروق ناجي مِن ضَرور
البَدوة جابَت جِمالا كور
سِرنا هايمين لِلمدينة أُم سور
نَدخُل أُم شَبَك لِلشَّفيع نَزور
نَكرُف المِسك النَّد والكافور
الفِراش ديباج والحَرير مَكجور
سَرجوا الأغوات وطلَّقوا البُخور
دوبا لي جِوار ذيلك القُبور
يا مَرحب الغُناة نِعمة ها الحُبور
شَيخنا ود حَليب في الرَّجز مَنبور
يَمدَحوا البادِراب والعَبيد ود نور
ناس بَشارة ضِلعاب والجُبور
نِعمة ود تَميم بالعِلم مَذكور
والقَرش مع العاقِب المَشهور
وابن حاجة اليمدى لِلصَّبور
والسَّخي العَبيد راوي ود أب كور
كُلهم سادات إلا أنا المَحقور
ما قَرِيت سَواد قَلبي كَيف مَحسور
ما جَرِيت قَلم وما كَتبت سُطور
تاه شَبَابي في هَوى الطَّنبور
نَسأل الكَريم شارِح الصُّدور
قولوا يا زِمال سُوقنا ما بيبور
نَقروا الدُّفوف وقَلَّبوا الشُّعور
شَكروا الحَبيب الزَّمن قاشور
غنّوا لِلرَّسول الذِّكر مَحضُور
تَكسَبوا الأمان بيها في أُم قُصور
الجَزاء النَّعيم والنِّساء حور
الصَّلاة عَلَيك يا النَّبيِّ المَنصور
الصَّلاة عَلَيك كُل لَيل ودور
الصَّلاة عَلَيك عَد ضياء الشُّهور
الصَّلاة عَلَيك مُدَّة الدُّهور
السَّلام يَفوق وابِل المَطور