نِعِمْ العَنِي وَرَوِّح
زار سَيِّدي الرَّسول في طَيْبَة واتسوَّح
في حَرَمُه الشَّريف
عَبْدَك يا عَلِيم بِما كَتَم و بَوَّح
مِن ذَنْبُه العَظيم ليك باكي يَتْنَوَّح
في الدُّنيا الغَرور ضاع عُمْرو فات رَوَّح
طَمْعان في عَفْوَك وفي الجَنَّة يِتْسَوَّح
في باقي العِمِير اسمح لُهُ يِرَوَّح
لطيبة السُّكون في رِباها يِتْرَوَّح
ويجاور الحَبيب في ساحَتُه يِتْنَوَّح
يُغريهو السَّلام كُل ساعَة ليو لَوَّح
ميلادو الفَخيم في مَكَّة والأفْراح
عَمَّت للبِقاع في كافَّة الأسْواح
طاب بيهو الوُجود والخَيْر عَمَّ انداح
وفارقنا النُّواح والحُزن والأتْراح
نَبِي اللَّه الحَليم بِغَضَبُه قَط ما باح
كان يَعْفي المُسيء يَسْتُر لُه الأقْباح
يُسِّر للصِّعاب أيْسَرها لينا أباح
البيهو النَّجاح والفَوْز والأرْباح
تِفْديك الرِّجال بالمُهَج والأرْواح
كاس حُبَّك يَدور بَيْناتَا زَي الرّاح
بذكرك دَوام دِيمة القُلوب شُرّاح
يا البيك الهَنا والبَهْجَة والأفْراح
الطَّاهِر العَفيف الزّاهِد لِحُطَامَا
الدُّنيا أم شَواغِل اللِّينا حَطَّامَا
أم نِعَمًا زَوال وقاسي لِفِطَامَا
رَدَّاهَا الرَّسول شَفَّاعنا في الطَّامَا
قائِد للأُمَم والمُرْسَلين وراك
حين صَلَّيْت إمام في القُدس يوم أسراك
كَم مِن مُعجِزات ليها الإله أراك
ومِن كَيْد اللِّئام المُجْرِمين وَراك
يا مَنْ في الفَخْر والكَرَم مُتَفَرِّد
الضَّيف حين يَجيك رِداك لُه تَفْرِد
أكرِم زَوْرتي وليا البِساط افْرِد
بالآل والبَنين جُمْلَة لا تَفْرِد
بالصَّحب الكِرام حَوْلَك وآل البَيْت
الصِّدِّيق عُمَر أهْل الثَّبات وتَثْبيت
ذي النُّورَيْن وعلي خاصَّة الحَبَّيْت
أصلِح شاننا في الوَطَن ثُمَّ البَيْت
يا روح الوُجود وروح المَلا الأعْلى
مَعْدوم الشَّبيه ليك المَقام أعْلى
يا النَّافي الخِصام الحَرْدة والزَّعَلَ
قول ذاك ود كنيش ما ضَرّا ما فَعَل
الصَّلاة تِنْكِتِب بِحِبْر القَبول ومِداد
تَعْطينا الأمان وتِفْزَعنا بالإمْداد
بالنَّصْر القَريب على كُل باغٍ عاد
مَقْطوع الأثَر للبلاد ما عاد