راقد جعان
راقد جعان من غير فرش
راقد جعان من غير ملاية ولا برش
السوق كبير والناس
تلقت في القرش
حلال حرام ما مهم
أخلاقا ما تمت في الكرش
غش في غش
وناس بتشقا
عشان تمش
يغلو في زاد البشر
حتى الخضار ما بنهبهش
راقد جعان في كوشه
ارحم من عرش
عرش الحرام الكلو غش
عرش حرام من ناس غبش
الصحة وين ولا الصحة
ما هما الكوش
كل مجتمع فيه الفساد
يصبح خجول ما ليهو وش
جات الكدايس تنهشو
جرهو ذي جر الكبش
والناس تقول ود النجس
وتتف عليه بالله كش
ادسا في مجرى الزلط
حلمك غريق ما لاقي قش
قالو جاي من غير عرس
لا ليهو أب لا ليهو حس
لا ليهو نعجة ولا فرس
لا ليهو عود يسند عليه
وقت نوزع في الفرس
حقوقو وين ود النجس
مصيرو يقبع في الحبس
إنسانية صبحت ما بتحس
فيها الحروب تكنس كنس
فيها اغتصاب فيها الرجس
فيها البخون بي كل نفس
فيها الأمانة بلا حرس
الإنسانية ماتت من أمس
وقت الهوية بقت جنس
أنت النجس وأنا النجس
والمجتمع عاوز درس
ضل الغلابة بقولوا عيش
فقدوا الكرامة عشان تعيش
وينو الذكاء أدوهو كيس
وينو الأمم ووينو الريس