حليل بلدي

حليل بلدي… وحليل بلدي
ويوم سمعتني قالت لي صدقتا صدقتا يا ولدي
شوف أحوالها ضاقت كيف وشيبت بدري
حليل بلدي الغنوها ناس زيدان وناس وردي
بتذكر زمان لما يقولو “سودان” في الكلام بلد جنه ملانه هداوة بال و خير وسلام
ولما نحيي علمنا نسرح و نتخيل حلاة احلام
نكبر ونلقى بلدنا احسن وماشه لي قدام
وما عارفين شنو البحصل مع الايام…
نحنا كبرنا والسودان كأنو اغتالتو الأوهام
حليل بلدي… وحليل بلدي
وتسأل زول وتتعجب شنو الأسباب؟
شنو السبب البخلي عروسة أفريقيا تبقى خراب؟!
وليه الطير الكان بجيها جعان أصبح غياب؟
ليه الصغير الاتولد اول كلامو الاغتراب ؟
ليه الشباب ساب الكفاح دفن النشاط تحت التراب؟
وهو الزول السألتو ولا معاك..قبيل نساك عايش ملل شايل هموم شلت دروب كل الأمل
وقفات صفوف رسمت على جسمو الكسل
يلقاها من الوقفه ولا من تعب العمل..
يلقاها من سعراً يزيد واصلاً مرتبو ما نزل
وافرض نزل..
يلحق مصاريف العيال
ولا يلحق كوم بصل؟!
حليل بلدي.. وحليل بلدي