ياريت تتكرم وتطرانا

أنا والأشواق والريد والبين
واللهفة الدايما ماليانا ..
في حضرة طيفك متلمين
مرات إحساسك بغشانا ..

فتحنا جروحنا و كل ما تبين
الذكرى الدايما لامانا ..
نعزما تتفضل مبتسمين
وحبابا بتسعد نجوانا ..

أها لامن مر علينا حنين
وعزمناهو القعدة معانا ..
كل ما يشرح كيف مشتاقين
أشواقك تضحك غامرانا ..

وبدينا الونسة خشم خشمين
قام دق النوم بابنا وجانا ..
دخل طيفك جوة العينين
إتخيل خلانا برانا !!! ..

و أنا عشت معاك في حلمي سنين
وبنيت في الأحلام دنيانا ..
والشوق والحن والكل عارفين
بي حال الريدة الظالمانا ….

لو مرة تفكر إنو تلين
وتراضي رؤانا العشمانة ..
حنكون والله ممتنين
يا ريت تتكرم وتطرانا ..