يومنا القُمنا من ناس دِكَّة المَتْبوره وقطَعْنا الوادي بايتين بي صباح حَمُّورَه
الْبِلْ شَلَّقَتْ فوق الفَجاج مجبوره واخوان فاطني ليها بسوّو طَقْ الكوره
يوم السَبْ عَصُرْ ودّعْنا نحن عربنا بي يوم الاحد قُمنا وعزلنا جلبنا
الفَرَقَه اتْفاسَحَتْ للساعه ما قَرَّبنا شادِّين حيلنا ما جانا الخبير سَرَّبْنا
أيامك ديلا مُسْواكَكْ طَروقَةْ نايْبَك واني مكازيكا في سَنْ البِكار ونقايبَك
تتضامَر واقَصرِّ في البُطان اللايبَك الرّجَع البلد ما جاب خبر لحبايبك
أيامك ديل تغادِرْ في الجَمَلْ زي حاقرو بنهاك مِنّو تبرُك بي صعيدو تناقرو
سَقَديب المِعَضّيهو الحِجِلْ فوق داقرو جاب من دومك الحِبِرْ المهاجِر فاقرو
حشاوك بتعتل لا الشرق وجادولك مخزز قشو عادم الحرق
كان تدريبنا يا الشلتي الغيار للمرق أصبح عيدنا بي غرب ام لعوته الزرقه
رَحَلَت وخَرت ناس سلي وبي دباب القفل جات يا زعم منها لي
قطعت وادي مجرور الحنينها بسلي عند امات لعايت تقلوها تدلي
عبدالقادر آبزورنا نوي بي الفزة داير يبعِدنا من دور ام حويجباً نزة
رشيد وصميم وقول بي الفاضيه ما بتْمزة لي دورهِن بقول للراعي اعقل ابوخزة
لفح ام تاج اخو شكله الطعامو موفّر ابعد ناينا من شيكة التملي مغفّر
نزل الليله في القايم عضي ومتقفّر دز جمالو لي اكال السحيه مسفّر
القدومو قرقور النداية السارب قالج الحوة راب زبد المصاع في الشارب
عانج عنقو لي المقميق وحيلو عقارب بجيبلو ضراع فرق كونيبو من الغارب
العزب الدوام لي الراعي ما بتداني هايج وسامح الدابي النفخ وردانه
قارع اماتو بوليس شرطه في ميدانه حس هدارتو رعداً مزنتو مراقدانا
اِديَّاتَكْ بِريقاتاً دَفَرْ قِبْليهِنْ دَفَاريك كيف زويقات الفِراد وَشَليهن
مِعْزِي القَرْقَفْ الهَسَّع بِعامي جَديهِن اِنْ اتْنايَنْ الليله الرِّغامْ تَدْنيهِن
زورَكْ طالْ وجوفَكْ رَقْ وبولَكْ عَفَّسْ النّوتِيَّه من فوق جَقْ
جَرْقومَكْ بِهَنْدِسْ في النَّدلْ ما بَقْ ناسي الغَزّا نَهَّادو وصِغيِّرْ دَقْ
زمنك كلو تاكل باردة ماضقت شر زمنك كلو نحن نعوم وانت تغنى ماسك البر
وزمنك كلو فوق الفارغة فوق ريح المدن منجر الخير انسرق من دارنا
لا حسيت ولا نحاس القبيلة نقر ولينا سنين خلانا سموم وما شربت حفايرو مطر
منيحه الشافع الأُماتو راحن فى شموس الحر صقور الباشا نهشن من ضروعا وفوقنا طارن فر
بنية لسالم وليد عتمان وصلاة الزين سموها الرتينة
أمها بت علي الخمجان خريف الرازه عزينه
كبار الحلة آباته بكار الحلة أماته
تمرق زينه تبرق زينه تمشي تهاتي وزينه
