عَقَدو الشوره ناس بارود وكَتَفو الشيل علي ابوسنينه ماهو قعود
أهَل عفّاسة القام بَضْرَه مو مَرْدود للمسكين برافو وبِرْقَعو المقدود
سيد الناقه دَوّرْ للجديدي وكاسه حَزَمْ الكيف زرازير الطمَلْ بلاّسه
حواها اتخنّق النوتيِتو رَشّ دهاسه تَلّتْ ضيلها كيف الشبّلَتْ فوق ناسه
مرعي امّاتك آالقاهريب بحور وجزاير اخضر وفيكَ لمحات الدباس الطاير
جمل اهل البواطن والجبين الناير طيّار حِج وحاسب للضحايا وزاير
تيس قُنّة الصي المتاتَنْ سَرَقو قصدو يهاجم المن المدامر مرقو
ريل ابن آدم القلب بالنواظر حرقو جبينو وصبري والنوم من عيوني اندرقوَ
عرب الباديه عقرو السوح وهَدَمو وشيّلو البُرّاقه فوق الشوح
عكّاناً مَزَرّد مو خضار مشروح بَلَداً فوقو عيل الضيب و رِدْ ام سوح
الوادي المِنَيِّل وفرعو سايق روبو عرب الباديه رحلو وقالو بِتْنايوبو
الصاول رفيقو وهاج مِنَسِّم دوبو الهِدَبْ ام شلايل كاشّه فوق عرقوبو
شال الليل هدير واتفجّرت دَهَرَابْتَه هَزّ العوضه نَمّرْ في القطاطي الثابته
الصّمُغْ القويّه كَدَابتَه ماصَه وليَّنْ المُرْبَطْ عِجيل سَحّابته
صباح الرّمْشَه جاري هَرَعْها السيل ضَبَّحْ الارْضْ والوِساخه جَمَعها
المدفونه في سابع الاراضي قلعها والوشّاشه في فروع الشَّدَرْ طلّعها
فيها المَرْخ وفيها اتمتَّعَتْ بَرّوق فيها اتْمَجْقْنَتْ لبّاعه اُم طايوق
فايِتْ خيرها داشر برّه مو ممحوق كُلْ ما يكْتَرْ الحاروك عليهو بحوق
رفيقي الدنيا ما سوّت هَوَسْ فوق راسو رفيقاً قلبو مو قرعوبه جابر ساسو
رفيقاً ضارعو بالهاشمي وعِرِفْتَ قياسو رفيقاً في البشوفُن مافي تَبْ ودكاسو
رفيقاً مو الطروره علي التفيهه بدِلّكْ رفيقاً مالو ليك وان انقبضتَ بحِلّك
ما بدورك ملانْ ويعافْ يَبَاسكْ وقِلّك رفيقي الواجِبْ انْ نَطّيت حدودو بذِلّك
طَلْقَة مِن رُشاش الزِّيفَه فوقنا تصَوّي دايرين ينعِم السَّافِل مشاتي الحَوِّي
أهَلْها يعَلِّقو الدَّقْما ام حديداً قَوّي يجيبو رسانة ابو قرون الدِّقاق مِتْلوّي
طَلْقَة من رُشاش لامن سنابَك قام وغاربَك فوقو دُقْن الطّافه من قِدّام
إضْليم حَمْرَكولا الما معاهُ نعام زايِع وفَزْ وخايف ورَفَّعْ العَوَّام
النمة لو بتجيبك غيري مين حبيبك ارض اليباس وراجي يوم صبيبك
يا حارقة جوفي وح قلب الثبات ان زح مكتول هواك لا حمة يوت لا قحه
متغرب بى المداين زى طيرة الجناين انقد في خيالي يا بهرة الرتاين
تتضاري ما بتبيني ولا هماك أنيني اساهر الليل واسوقو بى حنيني
كل ما يهب دعاش ويسارق الساهيت ل ليم الفنْجري وضلي الرهين شاشيت
ل سمح النافله والوجه الصبوح دوبيت ومع الطير البِغَرِّد في الدغش قوقيت
وحنين النوق وقرواح اللقح سوّيت إتَّ ما بتصر جبينك ول الكبار دعّيت
وتفقد الجار ول ضيف الهجوع عشّيت وكُتْ مقنع ولاياك كُتْ طنيبة البيت
هَزَّ جفونو فوق دَوْ الهَرَع قِبْليكي وكَجَرْ توب ليلو دَهَراباً عَقَبْ ضَحَويكي
شَوَايْلِكْ شوقَرَنْ والنَّوْ دعاش راويكي ووطاتِكْ خَرَّفَتْ صَنْقور وَسَارْ واديكي
بادْيَتْنا ام سَمَاح رَيم التَّبَاشير جاكي وهَبَّنْلِكْ رَشَايِم مَزَّرَنُّو سَمَاكي
وَاريبِكْ بِجيبْ هَرَعاً رَحَلْ مِتَّاكي وانْجَحَدَنْ سَمايْمِك والرَّزَاز وَاتَاكي
