هسّاعه وين بزراية النوراب ؟ ناس سالم حليلهُن وناس علي الهاقناب
هسّاع حزموه الشول ابودعكاب ؟ وبي قيزان بليل اتنايو لي ابوعجاب
ولّا اتياسرو فوق شق ابوجراب دو ناس ام سرير والإندراب
ألطف ياكريم ياربي يا وهاب بعد ها الزحْف يجينا الساري ابوجبجاب
قالوا البارح الساري ام رعوداً كرن شايلي الحينه كيف حينة المتل ما درّن
اتهبّر وِكا سحابها وتعولها انشرّن والمعُّوز وِراصن في الفريق انزرّن
الضحوي العوير يتراعف ابي مايقيف ادّي ام طانِب الدبَسيب وكُتر الزيف
جوِّكْ دابو بان فرق المدن والريف جو باريسي غير تكييف مراوح وليف
ماكي الهبيل ماكي البديل رُقّابة العيش التقيل
مزروعه في دار الضليل مُتْلابه في بَقَراً نحير
زرّوُبها في كَرَبْ السرير وبقرها يوت تافّ الغدير
فرْع الدُباغ الفي الوكيل قايم رَبو ونَبّوُت عديل
الليله آ الدعاش رِقْ ام وتيد فكّرْتو لي البي غرودو والكاكليتو حاوي بقرتو
وكتين تَطْرَي سام تَقَرو ومراعي ضَهَرْتو تجيكْ مِتْراحلي موجة سيل وطابقه مطرتو
بيرنا ام فاقَه يوت مَزْروده بي اللِّقْحَنْ بَدارا وطَقّنْ المَفْروده
ناساً يوم ضِماهُنْ بِرْكَبو المَكْروده ما بلاقونا فوق عِدْ السليم وارودا
قول لي محُمّد البِلْ بهدَلَنْ بي شايبو وَلَفَح الكور علي شوشة البِصَرِّج نايبو
بنات الادْرَع الشُّمّارتو فاصله حقايبو ما يغُشّنّكْ الريدهِن نتاج مو جايبو
يا جادالله بي الفَنْقات رُقادَك سيبو وسوق البل محاجين المِسَتّي وضيبو
كَفَلْ الفي البهايم تيرهولو حليبو ابَتْ حاروقه دارو ونحنَ بنلاهيبو
المهدوله دابه مدايفي عنّافيّي من القاعه سَدَرَتْ عايفي
كَبّ الليلي رَقّ حزامها صِبْحَتْ زايفي قاجّه قرونها من حوض اب قواطيع خايفي
يا قصب السلولي الفي الجزاير قايم يا الهَسَكي المَفَدّع دَقّو مو مِتْلايم
يا كَفَل البِسَوّولهِنْ سيور وصرايم يا العَنّافي ريدَكْ بِرمي فوقنا جرايم
فلخ الكربكان مييل عليها شخيب سررح تفته وسفف عدوها الخيب
كفاي ابقلوت فى الليد علالو سخيب جابن فى الترابله السرحه والنخيب
ابقيدوم بعد عرك ابجداد الغيم جلدنو البفشن لى المحول الضيم
الضلله الخلن من نمله دابيه وهيم إنفرشن برم جبر النحل لى الديم
حليل جاندي ام قعوداً خَبْ أم كيراً هاج واتجدّب
كتل بطنه وقفاهْ كَدّب وكل ما شافله راحله حَدَبْ
لي دورِك ركبنا عَزَبْ هناك عَقَر البغيل لي الكَبْ
عَقَرْ قَشّاَ مقامو اللّبْ مقام مَعَراب وطاته رَصَبْ
بِكيرة السّاق نَجَعْ في الصيف اُم راساً قُرْقُدْ العِلّيف
مهيرة الجرتقوله نسيف وعِرْ دربِك طريقتِك كيف
قالب الزرقه ماسورتو عَلَيْ اتواصو بازورتو
الكيف خَرْط القزاز صورتو زَرَدْ شَيْبونو فوق شورتو
راقْ السَحابْ رَوَّقْ رِدَمْ ومن الصعيد جـَن العِجَم
راعى البقـر راعى الغنم وإتهوَّل الطنبارى هـَم
كم يا أم سوالِفْ وكم وكـَمْ يا النـَذرى قطّاعة العَشم
حـَدباتها مافيهن مَجَمْ جـَدْيه ومراقدك فى السَلَـَمْ
