ليلك حر وزنق يا المريي نهارك وعدك جمو قل وعطشتنا ابيارك
سوو كنيش واكلو وشتتوها صغارك وفرحو ولعبو وكتين طارت ام بشارك
سماكي ملقحو عصار زنقة النسام سمومك تقلب الحبي وسحابك قام
مكاييل فك وابلك ودبسب الغنام فقع البضره سيلك وجاب حويل العام
وقفن جميع واتواسن الفرع الفتق كبرنو بي ضراسن
العنج المع النسام بطن بلاسن جبدهن للملايين كيف دبل فراسن
خطفتينا وعنيتي الريع ابوعجات يوم صباحي يوم بتقربي الاوكات
قبضتي جديكي والسراج مقيل وبات فوق النايبو طلقة معدن الجيمات
قصبة عِيَنْ سلولي الكبَّة سايِلْها بي نات البِحور حرَّاتْها شاتِلها
كسرولْهَا التَّرَس مادَّات فرادِلْها وفي وسط الجزاير نيم مِضَلِّلْها
رباعية بقر والقوز مِوَحِّلْها أم حربة الفي الهكاعة مِرَقِّدِي عِجِلْها
وبِت إبِل الشِّروق الحُرَّة في أصِلْها قَرنَت في الدِّهام والحِسْ مِجَفِّلها
السحب الدفر بقي مزني والهوا لافو إيدك يااب ضلف بتسوي لميع رافو
الرمت الكجر من المطلق نافو ابقي عليها ضيب قنصه وخبيبك خافو
الحارس الفريق مابغيب ماضاق بريت البخلفلها اللنقيب
ان جاتك قفاها متقلو الكونيب تتركز عروس قيلي وحجيلها قريب
اصلوا ام باعج الفوت هولها اعدلو مشيها بي المحلايه ماترتولها
نزلناها في القشه العكف جادولها نشارك عقصه في الدار التربي عجولها
سفيه الدكي ماضاق برية ام نوتيي عامل مهنتو البابور ابوحنفيي
قاعد عيل بحلق ما اشتغل بي سعيي كان حاريلو قرش بستهلك الطحنيي
البهم العنقو باهي وقاود السفنيي داير حنو لكن منو نيتو غنيي
شديد ودعيسي فوق الايدو هابقي سخيي عقر القش والرزامه جاها هويي
كبدي السايبة لاقت في الجراح ما لاقت ما كانت مآسي وإلا منها ضاقت
الحزن المكوم والأراضي الضاقت قول لي الخاوية عيني لا الصباح ما لاقت
عبد السلام علي مد الفضاء المفتوح تعترنا وجرحك في المفاصل نئ
كعادتك منعزل بالروح بتتسرب وتفقل فينا طاقة الضي
تلقى اللينا شاكر وتلقى لينا مِقلل وتلقى الخته عينو على الجميِع ويحلل
الغزره إن مطر سمحه ومعاها نَهلل علا العيش فرق ياقول مُحمّد شَلل
كتير البيصدر رايو دون إتدبّر كتير المفتقد ريش الجناح وتنبّر
كتير الأدو سر اول مقابل خبّر كتير الإنكسر عقبان بعد ماتجبّر
براق الصعيد جدد عليا حساري فك ساهيتو والزيف البولع ناري
الضحوي العوير عقبنو ليه سواري جابن حتي دوداب المشارع جاري
الوادي المجرف وعرقو بلحيل ضاري جاب هشوم مكنت ماشي كنو لواري
بي العربيه محتاج لي تمانيه كباري قطعوه الضعنهم في الرحيل متباري
الطلْح البشبه الحِنّه ترا ابوزنيقه نازلِنّه
أني من قُمْ حكيم دكتور الدانه الكمّلَتْ دار فور
نقيس النّمْ ونِرمي القول علي الناس البِربّو ام زور
ركب احمد طلع عنقور في الحاجز ديمه ظاهر تور
