مولد نورنا

اطناشر ربيع أول، دا مولِد نورنا
نوراً شَعَّ أخجل في الحقيقة بدورنا
يا رب بيهو نَوِّر كُلْ قلوبنا و دورنا
وارفع شانَّا حسرة و كيَّة للما بدورنا

ندعوكْ ربِّي هَوِّن مستحيل معسورنا
يشفى مريضنا يسلم، ينجَبِر مكسورنا
نار الحسرة تهمِد في قليب محسورنا
لا يزورنا الحرامي ولا يتَلِّب سُورنا

يا رب يا كريم ندعوكَ نوفي نِزورنا
يبقى طريقنا دُغري ويستقيم مشتورنا
نشفى من المصايب والبلا ألفي صدورنا
عِسّيم المفاصِل والصُّداع و فتورنا

يا رب يا كريم فَرِّج كُرَب معصورنا
أملا جيوبنا، يبقى بلا عدد محصورنا
عصر الفلسة يرحل، تضحى زاهية عصورنا
مِن بعد الرواكيب، تبقى عالية قصورنا

يا رب يا كريم نسمات بَرَكْتو تزورنا
في يوم القيامة ويستبينبو سرورنا
غُرْ ومُحَجَّلين بي قَدلة ضافي حضورنا
أمَّا على الصراط، كالبرقِ يبقى عبورنا

سِيد المرسلين العِطرو أذكى عطورنا
ندعوك باتِّباعو وطاعتو نَقِّي سطورنا
نرشف في جِنان الخُلدِ نحنا خمورنا
بي الطير المَحَمَّر يبقى ديمة فطورنا