جل الباري

بسم الله ياكدّك خبارك
دقش خمسين ؤماك حافظ تبارك
حُمدلله مون هينين كُبارك
خلوه وساقيه ماجاعن صُبارك

جلّ البارى أحسن ليك صُوره
خمجته الطينه عليتِن قِصوره
سبحان وحدو حاشاهو القِصورا
دحالنا الأرض أريافه ومِصوره

شوف الواطه وتفكّر براكه
جبالاً ثابته هُ بيعلم حِراكه
أنظُر رزقك البايعو وشِراكا
تنزّه ربى عن صحبه وشراكه

سمانا الفوقنا غير عمداً نشوفه
فطور مافيها لاعجة رِصوفه
أنظر تانى قلبهِن كشوفه
نظرك إجيكه محتارا أسوفه

بحارا زاخره والأمواج جُبالا
مراكب ماخره تتجارد حبالا
مسك ناصيتها وِجهَتها وقُبالا
مين منجيها إن ربك ابالا

ُهوام الغابه والكاسر البِنبِِّر
ماسك امرو سبحانو ؤمدبِّر
عريان جلدو والكاسى المِوَبِر
رزقو بجيهو مو كايِس إعبِّر

خلق عايمات ؤماشافن برارى
خلق عايشات على عامره وصحارى
خلق طايرات على نسق القمارى
جان واملاك ؤمافى الغيرو دارى

تلقى خلوق على اربع مشيهِن
ؤتلقى تلاته وِتميّز وشيهِن
على إتنين إكوسن فى رِشيهِن
ؤفى الزاحفات على كرشة حَشيهِن

شوف الناقه كيف ركّب جسومه
حتى فى ألبانه تتنوّع إسومه
شوف النخله ضُلاله وتسومه
تحت التمره حتى على خِسومه

أشهد إنو واحد مافى غيرو
وشهد إنو خير الدنيا خيرو
الكاتب عِزّو كضاب البضيرو
والخته نهايتو وين ألقى البجيرو

أرسل رسلو صلواتاً تصلهم
مِن خير خلقو ميّزهم فصلهم
نور إتهادو بى الرحمه وغسلهم
مُون ناس شيّه متفلِخ بصلهم

عملو وتِعبو مانامو إستكانو
ولاكتموها لى البيعادو لانو
ضربو الكفرى فى عِزّو وبكانو
رقدو رميصه لاهسّع مكانو

لامن ختمو بى سيدنا ورسولنا
بيهو سِعدنا وِبتهجت فِصولنا
بى والدينا وأفرعنا وإصولنا
ليهو آربى يتحقق وِصولنا

مُحمد خيّر خلق الله ضُمّه
مُحمد خلقو زايد أخلاقو تمّه
مُحمد كل رُسل اللهِ امّه
كم بى ذكرو إنتمت مُهِمّه

يانفاض على فكرى وخيالى
بدورك تبقى لي زامله وموالى
أنسى علوق وأيامنا الخوالى
شديدك ببقى من سبحه ومصالى

قالي ديله يانِعم القطيفه
قول وَنعشنى بى السيره اللطيفه
جاتو أبواتى لى النحره وهنيفه
مادّه رقابه لى كفو الشريفه

حلب العجفا وِتفوجج دريره
أحيا الضب وِتكلّم جهيره
ردّ العين بعد عرفت مصيره
وقفت شمسو شان تتلمه عيره

يوم فى القصعه ختاهن اصابعو
ألمى الجارى تتعدد منابعو
شِربو إتوضو شهدولو البرابعو
من البركه ماتوجد البِتابعو

من القلعه شدّينا وخترنا
نصلى عليهو وِتنغّم وترنا
من شرق اللّا ماتُهنا وفترنا
ربك إغفر الماضى وهترنا

نَقِيل فى حله نصبح فى خِلافه
قدم زاملتنا ماتشكى الضلافه
بدام صلواتنا باقيالنا السُلافه
مى هامّانا سقّايه وعَلافه

قتلو آنافِض المالح أمامنا
خُته كبيره والأكبر هيامنا
قالى أتلبب آحافظ سنامنا
بى القاصدنو إتحقق مُرامنا

فيك ياجده إتأكّد حضورنا
خلاس أحرمنا قابلنا البِدورنا
نكبّر دمعه بالّاهن سدورنا
بى قدرة اللّا مليانات قِدورنا

قدرة المولى إتجلّت مخافتو
فى نص كبدى حين البيتِ طافتو
رجفت رجفه زاد الدنيا عافتو
مقام سيدنا إقتربت مسافتو

الحجر الأسود الختّاك نبينا
يوم إختلفو ..بى شوفتك حِبينا
بى تقبيلتك التفرِح سِبينا
أريتنا إن جنبك آلأقدس ربينا

منى المعروفه من زمن الصحابه
غير ذكر الله خاصّتنا بنهابه
ليك ياعرفه نتدرّع سحابه
ذنوبنا تولى بى الدعوه المُجابه

فى مُزدلِفه والتكبير تعالا
والتهليل إشِد عزم الكسالى
فِضنا وطفنا بى بيت الفضاله
بيت المولى سبحانو وتعالى

جينا المروه والصفا تب صفينا
سعينا خُشاع ؤهرولنا ودِفينا
وِجوهنا إتوجهّن ليكه وقِفينا
ربى أقبلنا بى حِلمك عِفِينا

رمينا الجمره كبّرنا ونهلل
زمزم زادنا تسقينا وتبلل
إتساوا نهارنا والليل المِفلل
ربى أغفرلنا الذنب المِجلل

رحمتك ربى تتنزّل علينا
ذنوبنا كتيره جاهرَنا وبلينا
شربنا لِبسنا فوّرنا وقلينا
مَنا عارفنو من وين الشِلينا

مكّه خلاس ؤوجهتنا المدينه
لى القالولو قد أكملنا دينا
نور من نور ومن نورك هِدينا
لولا نورو لهلكنا ورِدينا

ندخل الروضه وِزدادبك خِشوعنا
نسلِّم ؤبيكه يتاصَل قِطوعنا
لولا السلطه مادايرين رجوعنا
إنته إياكه شافعنا وربوعن

عدد ماعبدو ناس الليل ؤقامو
عدد ماغفلو ناس الضِل ؤها
عددالمَبِنى لاطينو ورخامو
حافظ إصلى ياسيدى وسلام

عبد الله إنته وياك رسولو
أقمته الدين وإعتدلت إصولو
صحابتك كانو فى الميدان بِصولو
لامن لينا إتحقق وِصول

قعد فى القيد ؤفكيت الجِديه
أنصفته بعير من المِحنه العديّه
إنته الرحمه والنِعمه وهديّه
وإنته ضمينا يوم النار بديّ

كفّك هدّم الأصنام ؤزاله
ؤطِهرت مكّه من دنس الرزاله
رِعيت ؤخصفته وتقنته النِزاله
بخت العندو فى ذِكرك جَزال

ابوبكر رفيق الغار ؤهجر
ياما دمعو لى مولاهو أجرى
عمر الزاجر الشيطان زجره
سلامُُ طابت الأحباب حُجره

ذو النورين يانعم الخليفه
سيد الرايه والصدقه الكثيفه
الكرار ؤصولاتو المُخيفه
كم صنديد صفق خلاهو جيفه